ᓄᓇᕗᑦ ᓇᓗᓇᐃᒃᑯᑕᖓ

ᑐᖑᔪᖅᑐᖅ ᐊᒻᒪᓗ ᖁᖅᓱᖅᑐᖅ ᓴᖅᑭᔮᕐᓂᖅᐹᖑᖕᒪᑕ, ᐊᒥᐊᖏᑦ ᓇᓗᓇᐃᖅᓯᔪᑦ ᓄᓇᒥᒃ, coat of armsᑕᕆᐅᕐᒥᒃ ᐊᒻᒪᓗ ᕿᓚᖕᒥᒃ.

ᓇᓗᓇᐃᒃᑯᑕᖅ ᑕᖅᓴᓕᖅᓯᒪᔪᖅ ᐃᓄᒃᓱᖕᒥᒃ, ᐃᓄᒃᓱᒡᓗ ᐃᓄᖕᓄᑦ ᓇᓗᓇᐃᒃᑯᑕᐅᓲᖑᓪᓗᓂ ᓄᓇᒥ ᐃᖏᕐᕋᓕᕌᖓᒥᒃ, ᓇᓗᓇᐃᖅᓯᓪᓗᓂᓗ ᓄᓇᓂᒃ ᖃᐅᔨᒪᔭᐅᔭᕆᐊᖃᖅᑐᓂᒃ. ᖁᓪᓕᖅ ᓇᓗᓇᐃᖅᓯᕗᖅ ᖃᐅᒪᓂᕐᒥᒃ ᓂᕈᒥᖕᓂᕐᒥᒡᓗ ᑲᑎᓐᖓᑎᓪᓗᒋᑦ ᖃᑕᓐᖑᑎᒌᑦ ᓄᓇᖅᑲᑎᒌᓪᓗ.

ᖁᓕᑦᑎᐊᖓᓂ ᓂᕕᖓᔮᖅᑐᑦ ᑕᓪᓕᒪᑦ ᐊᖕᒪᓗᖅᑕᑦ ᖁᖅᓱᖅᑐᑦ ᓯᕿᓂᕐᒥᒃ ᓇᓗᓇᐃᖅᓯᕗᑦ, ᓄᓇᕗᒻᒥ ᑕᒪᓐᓇ ᐊᔾᔨᐅᓐᖏᓐᓂᓪᓚᕆᐅᖕᒪᑦ. ᐅᓪᓗᕆᐊᓐᖑᐊᖅ ᓂᕿᑦᓱᐃᑦᑐᕐᒥᒃ ᑕᐃᔭᐅᔪᖅ, ᑖᓐᓇ ᐅᓪᓗᕆᐊᖅ ᑕᒻᒪᕇᒃᑯᑎᒋᔭᐅᕙᒃᑐᑐᖃᐅᖕᒪᑦ ᐊᒻᒪᓗ ᐃᓐᓇᕐᓄᑦ ᐊᑐᖅᑕᐅᓪᓚᕆᒃᖢᓂ.

ᖄᖓᓂ ᐃᒡᓗᓐᖑᐊᖅᑕᓕᒃ, ᑐᑭᖃᖅᖢᓂᓗ ᐃᓄᐃᑦ ᐱᖅᑯᓯᕆᕙᓚᐅᖅᓯᒪᔭᖏᓐᓂᒃ ᐊᒻᒪᓗ ᐊᓐᓇᐅᒪᔪᓐᓇᕐᓂᕐᒥᒃ ᑐᑭᖃᖅᖢᓂ. ᓇᓗᓇᐃᒃᑯᑕᐅᖕᒥᔪᖅ ᒪᓕᒐᓕᐅᖅᑏᑦ ᑲᑎᒪᖃᑦᑕᕐᓂᖏᓐᓂᒃ, ᑲᑎᑉᐸᖕᓂᖏᓐᓂᒡᓗ ᓄᓇᕗᒻᒧᑦ ᐱᐅᓂᖅᐹᓂᒃ ᓴᖅᑭᑦᑎᓂᐊᕐᓂᖏᓐᓂᒃ; ᑯᐃᓐ ᓇᓗᓇᐃᒃᑯᑕᖓ ᐃᒡᓘᑉ ᖄᖓᓄᑦ ᐃᓕᓯᒪᔪᖅ, ᓇᓗᓇᐃᒃᑯᑕᐅᓪᓗᓂᓗ ᓄᓇᕗᒻᒥᐅᓕᒫᑦ ᐊᑕᐅᓯᕐᒥᒃ ᒐᕙᒪᖃᕐᓂᖏᓐᓂᒃ ᐊᒻᒪᓗ ᓄᓇᕗᑦ ᓇᓕᒧᒋᔭᐅᖃᑕᐅᓂᖓᓂᒃ ᐊᓯᖏᓐᓄᑦ ᐅᑭᐅᖅᑕᖅᑐᒥ ᐊᒻᒪᓗ ᑲᓇᑕᒥ ᒐᕙᒪᖃᕐᕕᐅᔪᓄᑦ.

ᑐᒃᑐᓐᖑᐊᖅ ᐊᒻᒪᓗ ᕿᓚᓗᒐᓐᖑᐊᖅ ᑑᒑᓕᒃ ᓇᓗᓇᐃᒃᑯᑕᐅᕘᒃ ᐱᓱᒃᑐᓂᒃ ᐳᐃᔨᓂᒡᓗ ᓂᕐᔪᑎᓂᒃ, ᑕᒪᒃᑯᐊ ᓂᕐᔪᑏᑦ ᓄᓇᕗᒻᒥᐅᓄᑦ ᐊᑐᖅᑕᓪᓚᕆᐅᖕᒪᑕ ᐊᒻᒪᓗ ᐊᓐᓇᐅᒪᔾᔪᑎᓪᓚᕆᐅᓪᓗᑎᒃ.

ᓇᓗᓇᐃᒃᑯᑕᖅ ᑐᓐᖓᕕᓕᖅᓯᒪᔪᖅ ᓄᓇᓐᖑᐊᕐᒥᒃ ᑕᕆᐅᕐᒥᒡᓗ, ᐱᖓᓱᓂᒡᓗ ᐅᑭᐅᖅᑕᖅᑐᒥᐅᑦ ᓄᓇᕋᖏᓐᓂᒃ ᐱᑕᖃᕆᓪᓗᓂ.

ᑎᑎᖅᑲᖏᑦ ᐃᓄᒃᑎᑐᑦ ᑎᑎᕋᖅᓯᒪᕗᑦ, ᐅᖃᖅᓯᒪᓪᓗᓂ "ᓄᓇᕗᑦ ᓴᓂᕗᑦ".

ᓄᓇᕗᑦ ᓇᓗᓇᐃᒃᑯᑖ ᑎᑎᕋᐅᔭᖅᑕᐅᓚᐳᖅᓯᒪᔪᖅ ᐋᓐᓄᓘ ᖄᐱᖕᒧᑦ ᐸᖕᓂᖅᑑᕐᒥᐅᒧᑦ.

ᐃᖅᓱᒐᖅ ᐊᒻᒪᓗ ᓄᓇᕗᑦ ᓇᓗᓇᐃᒃᑯᑖ ᐃᔾᔪᐊᖅᑕᐅᔭᕆᐊᖃᓐᖏᓚᑦ, ᐊᑐᖅᑕᐅᔪᓐᓇᖅᑐᑐᐊᖑᓪᓗᑎᒡᓗ ᓄᓇᕗᑦ ᒪᓕᒐᓕᐅᕐᕕᐊᓄᑦ, ᐃᔾᔪᐊᖅᑕᐅᔭᕆᐊᖃᓐᖏᖢᑎᒃ ᑎᑎᕋᖅᑎᐅᑉ ᑎᑎᕋᕐᕕᖓᓐᓄᑦ ᐊᖏᖅᑕᐅᓯᒪᓐᖏᓪᓗᑎᒃ.