ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᑐᑭᒧᐊᒍᑎᒃᓴᕐᓂᒃ ᐸᕐᓇᐅᓯᐅᕆᐊᖅᑐᕐᓗᑎᒃ ᕿᒪᕉᑎᓯᒪᓗᑎᒃ ᑲᑎᒪᓛᖅᑐᑦ ᐃᖃᓗᑦᑑᑦᑎᐊᒥ

ᐃᖃᓗᐃᑦ, ᓄᓇᕗᑦ (ᑎᓯᐱᕆ1, 2021) - ᒪᓕᒐᓕᐅᖅᕕᐅᑉ ᒪᓕᒐᓕᐅᖅᑎᓕᒫᖏᑕ ᑲᑎᒪᔨᖏᑦ ᑲᑎᒪᖃᑦᑕᓛᖅᑐᑦ ᑎᓯᐱᕆ 6-ᒥᑦ−10-ᒧᑦ, 2021-ᒥ, ᑐᑭᒧᐊᒍᑎᒃᓴᕐᓂᑦ ᐸᕐᓇᐅᑎᓕᐅᕐᓗᑎᒃ ᕿᒪᕉᑎᓯᒪᓂᕐᒥ ᑲᑎᒪᓂᖃᕐᓗᑎᒃ.

ᓯᕗᓕᖅᑎ ᐊᕿᐊᕈᖅ ᖃᐃᖅᑯᔨᓚᐅᕐᒥᔪᖅ ᑲᑎᒪᔨᐅᖃᑕᐅᔪᓂᒃ ᓄᓇᕗᑦ ᑐᓐᖓᕕᒃᑯᑦ ᑲᑎᒪᔨᖏᓐᓂ ᑲᑎᒪᖃᑕᐅᖁᓪᓗᒋᑦ ᒪᓕᒐᓕᐅᖅᑎᓕᒫᑦ ᕿᒪᕉᑎᓯᒪᓗᑎᒃ ᑲᑎᒪᓂᖏᑕ ᐅᓪᓗᖓᓂ ᓯᕗᓪᓕᖅᐹᖓᓂ. ᑕᒪᓐᓇ ᓯᕗᓪᓕᐹᑦᑎᐊᖑᔪᖅ ᑖᒃᑯᐊ ᒪᓕᒐᓕᐅᖅᑎᓕᒫᑦ ᐊᒻᒪᓗ ᓄᓇᕗᒻᒥ ᐃᓄᐃᑦ ᑎᒥᖁᑎᖏᑦ ᑲᑎᖁᔭᐅᓯᒪᑎᓪᓗᒋᑦ ᑲᑐᔾᔨᖃᑕᐅᖁᔭᐅᓪᓗᑎᒃ ᑐᑭᒧᐊᒍᑎᒃᓴᕐᓂᑦ ᐸᕐᓇᐅᑎᓕᐅᖅᑎᓪᓗᒋᑦ ᓴᖅᑭᖅᓯᔾᔪᑎᐅᓛᖅᑐᓂᒃ ᓄᓇᕗᑦ ᒐᕙᒪᖓᑕ ᑐᕋᖅᑕᕆᓂᐊᖅᑕᖏᓐᓂᑦ.

“ᐱᓕᕆᐊᖃᕆᐊᓕᖅᑎᓪᓗᑕ ᐱᒻᒪᕆᐊᓘᔪᒥᒃ ᓇᓗᓇᐃᖅᑐᐃᓂᕐᒥᒃ ᑐᕌᖅᑕᕆᓂᐊᖅᑕᑦᑕ ᐅᖃᐅᓯᖏᓐᓂᑦ ᒪᓕᒐᓕᐅᖅᑎᐅᓂᑦᑎᓐᓂ ᑐᕌᕐᓂᐊᖅᑕᑦᑎᓐᓂᑦ, ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᕙᖓᓗ ᐊᖏᖅᓯᒪᓂᖃᑦᑎᐊᖅᐳᒍᑦ ᖃᓂᒃᓴᕐᓗᑕ ᖃᓄᖅ ᐃᓱᒪᖃᖅᕕᐅᒻᒪᖔᑕ ᖃᐅᔨᒋᐊᖃᑦᑕᓂᐊᕐᓂᕋᖅᑐᑕ ᒪᓕᒐᓕᐅᖅᑎᐅᖃᑕᐅᔪᓕᒫᓂᒃ ᒪᓕᒐᓕᐅᖅᕕᒻᒥ ᐊᒻᒪᓗ ᐃᓄᐃᑦ ᑎᒥᖁᑎᖏᓐᓂᑦ ᓴᓇᔪᓐᓇᕐᓂᐊᕋᑦᑕ ᐊᑐᐊᕋᒃᓴᐅᔪᓂᒃ ᓴᖅᑭᔮᖅᑎᑦᑎᔪᓂᒃ ᓴᓐᖏᔪᓂᒃ ᑲᑐᔾᔨᓂᕐᒦᖔᖅᑐᓂᒃ ᓂᓪᓕᐊᔪᔾᔨᔪᓐᓇᕐᓗᑕ ᓄᓇᕗᒻᒥᑦ,” ᓯᕗᓕᖅᑎ ᐊᕿᐊᕈᖅ ᐅᖃᓚᐅᖅᑐᖅ. “ᑲᑎᒪᖃᑦᑕᓛᖅᑐᒋᔪᖓ ᐃᓗᓕᖅᑐᔪᓂᒃ ᓴᓂᒧᑐᔪᓂᓪᓗ ᐅᖃᐅᓯᖃᖃᑦᑕᕐᓗᑕ ᐱᔾᔪᑎᖃᖅᑐᓂᒃ ᑲᑐᔾᔭᑎᓐᓂᑦ ᓯᕗᓪᓕᐅᖁᔭᑦᑎᓐᓂᑦ ᓄᓇᕗᖁᑎᑦᑎᓐᓂ.”

ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑕ ᐃᒃᓯᕙᐅᑕᖓ ᐅᖃᓚᐅᖅᑐᖅ, “ᐃᓚᖓᑦ ᓇᓗᓇᐃᒃᑯᑕᓪᓚᕆᒋᒻᒪᒍ ᐊᕕᑦᑐᖅᓯᒪᓇᑕ, ᐊᖏᖃᑎᒌᓐᓂᒃᑯᑦ ᑲᒐᕙᒪᕐᓂᑦᑕ ᓄᓇᕗᒻᒥ ᑕᒪᓐᓇᐅᒻᒪᑦ ᒪᓕᒐᓕᐅᖅᑎᓕᒫᑦ ᐃᓱᒪᒃᓴᖅᓯᐅᖃᑎᒌᒍᓐᓇᕐᓂᖓᑦ ᐊᔾᔨᒌᓂᒃ ᐱᔪᓐᓇᐅᑎᖃᖅᑐᐃᓐᓇᐅᓪᓗᑎᒃ. ᐃᓚᐅᖃᑕᐅᖃᑦᑕᖅᓯᒪᓪᓗᖓ ᑕᐃᒪᐃᑦᑐᓄᑦ ᐸᕐᓇᐅᓯᐅᖅᑐᓄᑦ ᕿᒪᕉᑎᓯᓪᓗᑎᒃ ᑲᑎᒪᔪᓄᑦ, ᖃᐅᔨᒪᑦᑎᐊᕋᒃᑭᑦ ᐱᒻᒪᕆᐅᓂᖏᑦ ᐊᒻᒪᓗ ᐊᑑᑎᖃᕐᓂᖏᑦ.”

ᐅᖃᖅᑎ ᑑᓂ ᐋᖁᐊᖅ ᐅᖃᓚᐅᖅᑐᖅ, “ᑖᓐᓇ ᑲᑎᒪᓂᖅ ᖃᐅᔨᒪᔭᐅᓂᐊᖅᑐᖅ ᓯᕗᓪᓕᐹᑦᑎᐊᖑᒻᒪᑦ ᑕᒪᒃᑯᐊ ᒪᓕᒐᓕᐅᖅᑎᓕᒫᑦ ᑲᑎᔪᓐᓇᖅᓯᑕᐃᓐᓇᑎᓪᓗᒋᑦ ᐊᖏᔪᖅᑳᖃᖅᕕᐅᑉ ᓯᓚᑖᓂ ᑕᐃᒪᓐᖓᑦ ᓄᕙᓐᓇᕐᔪᐊᖅ ᓴᖅᑭᓚᐅᖅᓯᒪᑎᓪᓗᒍ. ᑲᔪᖏᖅᑐᒍᑦᑕᐅᖅ ᑲᑎᖃᑎᖃᕈᓐᓇᓛᕋᑦᑕ ᓄᓇᓕᐅᑉ ᓯᕗᓕᖅᑎᖏᓐᓂᑦ ᐃᖃᓗᑦᑑᑦᑎᐊᕐᒥᐅᓂᓪᓗ.”

-30-

ᑐᑭᓯᒋᐊᕈᒪᒍᒃᓯ:

ᔮᓐ ᑯᐊᒃ
ᒪᓕᒐᓕᐅᖅᕕᐅᑉ ᑎᑎᕋᖅᑎᖓ
ᖃᕋᓴᐅᔭᒃᑯᑦ: LegInfo@assembly.nu.ca

ᓯᒪ ᓯᐅᕆᕼᐃ
ᐱᕙᓪᓕᐊᔪᓕᕆᔨᖓ, ᓯᕗᓕᖅᑎᐅᑉ ᐊᓪᓚᕝᕕᖓᓂ
ᖃᕋᓴᐅᔭᒃᑯᑦ: szerehi6@gov.nu.ca