ᐃᖃᓗᐃᑦ, ᓄᓇᕗᑦ, (ᓄᕕᐱᕆ 22, 2021) – ᐅᖃᖅᑎ ᑑᓂ ᐊᖁᐊᖅ ᐅᓪᓗᒥ ᑐᓴᖅᑕᐅᑎᑦᑎᒃᑲᐅᕗᖅ ᑕᐃᒃᑯᐊ ᒪᓕᒐᓕᐅᖅᕕᐅᑉ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᓇᓗᓇᐃᖅᓯᓯᒪᓕᕐᓂᕋᖅᑐᒋ ᑲᑎᒪᕐᔪᐊᖅᑐᑦ ᐱᒋᐊᒃᑲᓐᓂᓛᕐᒪᑦ ᓇᒡᒐᔾᔭᐅᖑᓕᖅᐸᑦ, ᕕᕝᕗᐊᕆ 21, 2022−ᒥ, ᐅᑭᐅᒃᑯᑦ ᐃᒃᓯᕙᓂᖏᓐᓄᑦ. ᑖᓐᓇ ᐅᓪᓗᖅ ᓇᓗᓇᐃᖅᑕᐅᑦᑎᐊᓛᖅᑐᖅ ᒪᓕᒐᓕᐅᖅᕕᒻᒥᑦ ᑐᓴᖅᑕᐅᑎᑦᑎᔾᔪᑎᑎᒍᑦ.
ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᖃᖅᑐᖅ, “ᑲᑎᒪᕐᔪᐊᕕᒻᒥ ᑭᖑᓪᓕᕐᒥ ᐃᒃᓯᕙᓂᖅ ᐱᒋᐊᓚᐅᓐᖏᓐᓂᖓᓂ, ᒪᓕᒐᓕᐅᖅᑎᓕᒫᑦ ᑲᑎᓛᖅᑐᑦ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐱᓕᕆᐊᖃᕆᐊᓕᖅᐸᑕ ᐱᒻᒪᕆᐊᓘᔪᒥᒃ ᖃᑐᑎᔭᐅᔪᒥᒃ ᓇᓗᓇᐃᖅᑐᐃᓂᕐᒥᒃ ᑐᕌᖅᑕᕆᓂᐊᖅᑕᖏᓐᓂᑦ ᓂᕈᐊᖅᑕᐅᓯᒪᕕᖏᓐᓂ ᐊᑕᑎᓪᓗᒋᑦ. ᓂᕆᐅᑦᑎᐊᖅᐳᖓ ᒪᓕᒐᓕᐅᖅᕕᒻᒧᑦ ᓴᖅᑭᖅᓯᓛᕐᓂᕆᔭᓐᓂᒃ ᒐᕙᒪᒃᑯᑦ ᑐᕌᖅᑕᕆᓂᐊᖅᑕᖏᓐᓂᑦ ᐱᔪᓐᓇᖅᓯᑐᐊᕈᒪ.”
ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑕ ᐃᒃᓯᕙᐅᑕᖓ ᔫ ᓴᕕᑲᑖᖅ ᐅᖃᖅᑐᖅ, “ᓂᕈᐊᖅᑕᐅᕋᑖᖑᔪᑦ ᒪᓕᒐᓕᐅᖅᑏᑦ ᐱᔭᕇᖅᓯᓛᖅᑐᑦ ᐃᓕᓐᓂᐊᖅᑎᑕᐅᓂᖏᓐᓂᑦ ᓄᑖᓂᒃ ᐱᓕᕆᔨᐅᓂᕐᒥᒃ ᐱᓕᕆᐊᒃᓴᖏᓐᓂᓪᓗ ᔮᓐᓄᐊᓕ ᑕᖅᑭᖓᓂ ᒪᕐᕉᓐᓂᒃ ᐱᓇᓱᐊᕈᓰᓐᓂᒃ ᑭᖑᓪᓕᖅᐹᖏᓐᓂ. ᒪᓕᒐᓕᐅᖅᑎᑐᐃᓐᓇᓕᒫᑦ ᐃᓱᒪᒃᓴᖅᓯᐅᕈᑎᖃᓛᕐᒥᔪᑦ ᒐᕙᒪᒃᑯᑦ ᓯᕗᓪᓕᐹᖅᓯᐅᑎᖏᓐᓂᑦ 2022-2023-ᒥ ᐊᑭᑐᔪᖅᑐᕈᑎᒃᓴᖏᓐᓂᑦ ᒥᒃᓴᐅᓯᔭᐅᓯᒪᔪᓂᒃ ᓴᖅᑭᖅᑕᐅᓚᐅᓐᖏᓐᓂᖏᓐᓂ ᐃᓱᒪᒃᓴᖅᓯᐅᕈᑎᐅᓂᐊᕐᓗᑎᒃ ᐅᑭᐅᒃᑯᑦ ᐃᒃᓯᓚᓂᖏᓐᓂ.”
-30-
ᑐᑭᓯᒋᐊᕈᒪᒍᒃᓯ:
ᔮᓐ ᑯᕘᒃ, ᑎᑎᕋᖅᑎ ᒪᓕᒐᓕᐅᖅᕕᒻᒥ
LegInfo@assembly.nu.ca
| Attachment | Size |
|---|---|
| ᒪᓕᒐᓕᐅᖅᕕᐅᑉ ᐱᒋᐊᓕᖅᑭᓂᒃᓴᖓ | 114.4 KB |