ᓄᓇᕗᒥ ᓯᕗᓕᖅᑎᒃᓴᓂᒃ ᑲᑎᒪᔾᔪᑎᖃᑎᓪᓗᒋᑦ ᒪᓕᒐᓕᐅᖅᑏᑦ ᑲᑎᒪᔨᖏᑦ ᓂᕈᐊᖅᐳᑦ ᐅᖃᖅᑎᒥᒃ, ᓯᕗᓕᖅᑎᒥᒃ ᐊᒻᒪ ᒥᓂᔅᑕᐃᑦ ᑲᑎᒪᔨᒋᓂᐊᖅᑕᖏᓐᓂᒃ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 18, 2025) - ᓄᓇᕗᑦ ᐅᖃᖅᑎᖓ, ᓯᕗᓕᖅᑎᖓᑦ ᐊᒻᒪ ᑲᑎᒪᔨᖏᑦ ᐊᐅᓚᑦᓯᔩᑦ (ᒥᓂᔅᑕᐃᑦ) ᐅᓪᓗᒥ ᓂᕈᐊᖅᑕᐅᖅᑲᐅᕗᑦ ᓄᓇᕗᒥ ᓯᕗᓕᖅᑎᐅᓂᐊᖅᑐᓂᒃ ᑲᑎᒪᔾᔪᑎᖃᖅᑎᓪᓗᒋᑦ. ᑲᑎᒪᔾᔪᑎᖃᖅᑲᐅᕗᑦ ᐃᓘᓐᓇᖏᑦ ᒪᓕᒐᓕᐅᖅᑏᑦ ᑲᑎᒪᔨᖏᑦ.

ᐱᖓᓱᑦ ᑲᑎᒪᔨᐅᔪᑦ ᐊᖏᖅᓯᖅᑲᐅᔪᑦ ᓂᕈᐊᒐᒃᓴᓐᖑᖅᑎᑕᐅᔪᒥᒃ ᐅᖃᖅᑎᒧᑦ. ᑕᐃᕕᑦ ᔪᐊᓇᓯ, ᒪᓕᒐᓕᐅᖅᑎ ᕿᑭᖅᑖᓘᑉ ᓂᒋᐊᓄᑦ, ᓂᕈᐊᖅᑕᐅᖅᑲᐅᔪᖅ ᐅᖃᖅᑎᓂᕐᒧᑦ.

ᒪᕐᕉᒃ ᑲᑎᒪᔨᐅᔫᒃ ᐊᖏᖅᓯᖅᑲᐅᔫᒃ ᓂᕈᐊᒐᒃᓴᓐᖑᖅᑎᑕᔪᒥᒃ ᓯᕗᓕᖅᑎᒧᑦ. ᔮᓐ ᒪᐃ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓚᖓᓗᑦ−ᑎᑭᕋᕐᔪᐊᕐᒧᓪᓗ, ᓂᕈᐊᖅᑕᐅᖅᑲᐅᔪᖅ ᓯᕗᓕᖅᑎᐅᓂᕐᒧᑦ.

9−ᖑᔪᑦ ᒪᓕᒐᓕᐅᖅᑏᑦ ᐊᖏᖅᓯᖅᑲᐅᔪᑦ ᓂᕈᐊᒐᒃᓴᓐᖑᖅᑎᑕᐅᒐᒥᒃ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ. ᐅᑯᐊᖑᔪᑦ ᒪᓕᒐᓕᐅᖅᑏᑦ ᓂᕈᐊᖅᑕᐅᖅᑲᐅᔪᑦ: ᒍᕆᐃᓐ ᕼᐃᓕ ᐊᕿᐊᕈᖅ, ᒪᓕᒐᓕᐅᖅᑎ ᐃᖃᓗᐃᑦ−ᒪᓂᕋᔭᖕᒧᑦ; ᑕᐃᕕᒃ ᐊᕿᐊᕈᖅ, ᒪᓕᒐᓕᐅᖅᑎ, ᐃᖃᓗᐃᑦ−ᓂᐊᖁᓐᖒᒧᑦ; ᔮᓇᑦ ᐱᑦᓯᐅᓛᖅ ᐳᕉᔅᑐ, ᒪᓕᒐᓕᐅᖅᑎ ᐃᖃᓗᐃᑦ−ᓯᓈᒧᑦ; ᔪᐊᔾ ᕼᐃᒃᔅ, ᒪᓕᒐᓕᐅᖅᑎ ᐃᖃᓗᐃᑦ ᑕᓯᓗᖕᒧᑦ; ᐳᕋᐃᐊᓐ ᑯᓄᒃ, ᒪᓕᒐᓕᐅᖅᑎ ᑐᓄᓂᕐᒧᑦ, ᓯᓯᐅᓪ ᓇᐅᓪᕚᓇ ᓚᐃᕈᓪ, ᒪᓕᒐᓕᐅᖅᑎ ᓇᑦᓯᓕᖕᒧᑦ; ᒍᕆᒃ ᓯᒪᐃᓚᒃ, ᒪᓕᒐᓕᐅᖅᑎ ᖃᒪᓂᑦᑐᐊᕐᒧᑦ ᐊᒻᒪᓗ ᐋᓂ ᑕᑦᑐᐃᓂ, ᒪᓕᒐᓕᐅᖅᑎ ᑲᖏᕐᓕᓂᐅᑉ ᓂᒋᐊᓄᑦ.

ᑖᒃᑯᐊ ᒪᓕᒐᓕᐅᖅᑏᑦ ᑲᑎᒪᔨᖏᑕ ᐊᒻᒪ ᐊᐅᓚᑦᓯᔨᑦ ᑲᑎᒪᔨᖏᑕ ᐱᖁᔭᕐᔪᐊᖓ ᒪᓕᒐᖃᖅᑎᑦᑎᕗᖅ ᓯᕗᓕᖅᑎᐅᔪᖅ ᐃᓱᒪᖅᓱᕐᓗᓂ ᑐᓂᓯᔪᓐᓇᕐᒪᑕ ᒥᓂᔅᑕᐃᑦ ᓇᓕᐊᖕᓄᑦ ᒥᓂᔅᑕᐅᕝᕕᖃᕐᓂᐊᕐᒪᖔᑕ.

ᐊᖏᖅᑎᑕᐅᓂᐊᖅᑐᑦ ᑲᑎᒪᔨᐅᖃᑕᐅᔪᑦ 7−ᒋᓕᖅᑕᖓᓂ ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ 10:00−ᒧᐊᖅᐸᑦ ᐅᓪᓛᒃᑯᑦ (ᑲᓇᖕᓇᒥᐅᑦ ᖃᐅᔨᓴᐅᑎᖓ ᐊᑐᕐᓗᒍ) ᑎᓴᒻᒥᕐᒥ, ᓄᕕᐱᕆ 20, 2025,−ᖑᓕᖅᐸᑦ ᑲᑎᒪᕐᔪᐊᕐᕕᐊᓂ ᒪᓕᒐᓕᐅᖅᑏᑦ ᑲᑎᒪᔨᖏᑕ. ᑎᑎᖅᑲᑎᒍᑦ ᐱᖁᔨᕗᖔᕐᓂᐊᖅᑐᑦ ᐊᖏᖅᑕᐅᓗᑎᒃ ᑎᒃᑯᐊᖅᑕᐅᓂᕆᔭᖏᑦ ᐅᖃᖅᑎᐅᑉ, ᓯᕗᓕᖅᑎᐅᑉ ᐊᒻᒪ ᐊᐅᓚᑦᓯᔨᑦ ᑲᑎᒪᔨᖏᑕ ᑖᒃᑯᐊ ᐱᓕᕆᔭᐅᔭᕆᐊᖃᖅᐳᑦ ᓯᕗᓪᓕᖅᐹᕐᒥ ᐅᓪᓗᕐᒥ ᑲᑎᒪᕐᔪᐊᓕᖅᑎᓪᓗᒋᑦ 7−ᒋᓕᖅᑕᖓᓂ ᒪᓕᒐᓕᐅᖅᑏᑦ ᑲᑎᒪᔨᖏᑦ, ᑖᒃᑯᐊ ᑲᑎᒪᓂᐊᖅᑐᑦ ᑎᓴᒻᒥᕐᒥ ᓄᕕᐱᕆ 20, 2025−ᒥ, 1:30-ᒥ ᐅᓐᓄᓴᒃᑯᑦ (ᑲᓇᖕᓇᒥᐅᑦ ᖃᐅᔨᓴᐅᑎᖓ ᐊᑐᕐᓗᒍ).

ᐊᖏᖅᑎᑕᐅᑎᓪᓗᒋᑦ ᐱᓕᕆᔭᐅᔪᑦ ᐊᒻᒪ ᓯᕗᓪᓕᖅᐹᕐᒥ ᑲᑎᒪᕐᔪᐊᖅᑎᓪᓗᒋᑦ 7−ᒋᓕᖅᑕᖓᓂ ᒪᓕᒐᓕᐅᖅᑏᑦ ᑲᑎᒪᔨᖏᑦ ᑕᑯᒃᓴᐅᑎᑕᐅᓂᐊᖅᑐᑦ ᑕᓚᕖᓴᒃᑯᑦ ᓄᓇᓕᖕᓂ ᑕᓚᕖᓴᒃᑯᑦ ᑕᑯᒃᓴᐅᑎᑦᑎᕕᖏᓐᓂ ᐊᒻᒪᓗ ᐊᖏᕐᕋᕆᔭᐅᔪᓂ ᖃᖓᑦᑕᖅᑎᑕᐅᓯᒪᔪᒃᑯᑦ ᐱᑐᒍᑎᖃᖅᑐᑦ ᑕᐅᑐᒍᓐᓇᕐᓂᐊᖅᑐᑦ ᐅᕘᓇ Bell (ᓵᓄ 513−ᑯᑦ) ᑕᓚᕖᓴᒃᑯᑦ. ᑲᑎᒪᓂᕆᔭᐅᔪᑦ ᑕᑯᒃᓴᐅᓂᐊᕆᕗᑦ ᐃᕐᖐᓐᓇᖅ ᐅᕘᓇ: https://assembly.nu.ca/webcasts. ᐃᖃᓗᖕᒥᐅᑦ ᓈᓚᒍᓐᓇᕐᒥᔪᑦ ᐃᕐᖐᓐᓇᖅ ᑲᑎᒪᔪᓂᒃ ᓈᓚᐅᑎᒃᑯᑦ ᑐᓴᖅᓴᐅᑎᑕᐅᓂᐊᖅᑐᑦ ᐅᑯᑎᒎᓇᖅ FM−ᑯᑦ : ᑲᑎᒪᔪᑦ ᓇᑎᐊ: 92.5 / ᐃᓄᒃᑎᑐᑦ: 94.7 / ᖃᓪᓗᓈᑎᑐᑦ: 102.1.

-30-

ᑐᓴᒐᒃᓴᒃᑲᓐᓂᕐᓂᒃ ᐱᔪᒪᒍᕕᑦ ᐅᕙᓃᖅᑐᑦ:
LegInfo@assembly.nu.ca