ᒪᓕᒐᓕᐅᖅᑏᑦ ᑲᑎᒪᔨᖏᑦ ᑐᓴᖅᑎᑦᑎᕗᑦ ᐅᓪᓗᕆᓂᐊᖅᑕᖓᓂᒃ ᐊᒻᒪ ᐋᖅᑭᒡᓯᒪᓂᕆᓂᐊᖅᑕᖓᓂᒃ ᓄᓇᕗᒥ ᓯᕗᓕᖅᑎᒃᓴᓂᒃ ᑲᑎᒪᔾᔪᑎᖃᖅᑎᓪᓗᒋᑦ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 17, 2025) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᐅᓪᓗᕆᓂᐊᖅᑕᖓᓂᒃ ᐊᒻᒪ ᐋᖅᑭᒡᓯᒪᓂᕆᓂᐊᖅᑕᖓᓂᒃ 2025−ᒥ ᓄᓇᕗᒥ ᓯᕗᓕᖅᑎᐅᓂᐊᖅᑐᓂᒃ ᑲᑎᒪᔾᔪᑎᖃᓕᖅᐸᑕ. ᑖᒃᑯᐊ ᑲᑎᒪᔾᔪᑎᖃᕐᓂᐊᖅᑐᑦ ᒪᓕᒐᓕᐅᖅᑎᓕᒫᑦᑎᐊᑦ.

ᑲᑎᒪᓂᐊᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᐊᓂ, ᐱᒋᐊᕐᓗᑎᒃ 10:00 ᐅᓪᓛᒃᑯᑦ (ᑲᓇᖕᓇᐅᑉ ᖃᐅᔨᓴᐅᑎᖓ ᐊᑐᕐᓗᒍ) ᐊᐃᑉᐱᕐᒥ, ᓄᕕᐱᕆ 18, 2025−ᒥ. ᓂᕈᐊᕐᓂᐊᖅᑐᑦ ᐅᖃᖅᑎᒥᒃ, ᓯᕗᓕᖅᑎᒥᒃ ᐊᒻᒪ ᑲᑎᒪᔨᒋᓂᐊᖅᑕᖏᓐᓂᒃ ᐊᐅᓚᑦᑎᔩᑦ ᑲᑎᒪᔨᖏᑕ (ᒥᓂᔅᑕᐃᑦ ᑲᑎᒪᔨᖏᓐᓂᒃ) ᑖᒃᑯᐊ ᓂᕈᐊᕐᓂᐊᖅᑐᑦ ᑲᓐᖑᓇᖅᑐᒃᑯᑦ ᐸᐃᑉᐹᑎᒍᑦ ᓯᕗᓪᓕᖅᐹᕐᒥ ᑲᑎᒪᔾᔪᑎᒋᔭᐅᓂᐊᖅᑐᖅ ᓂᕈᐊᖅᓯᕐᓗᑎᒃ ᐅᖃᖅᑎᒥᒃ. ᑖᓐᓇ ᐅᖃᖅᑎ ᓂᕈᐊᖅᑕᐅᔪᖅ ᑲᑎᒪᔨᑦᓯᓂᐊᖅᑐᖅ ᑲᑎᒪᔾᔪᑎᖃᖅᑎᓪᓗᒋᑦ ᓯᕗᓕᖅᑎᐅᓂᐊᖅᑐᓂᒃ.

ᑐᒡᓕᐊᓂ ᑲᑎᒪᔾᔪᑎᖃᕐᓂᐊᖅᑐᑦ ᓂᕈᐊᕐᓗᑎᒃ ᓯᕗᓕᖅᑎᒥᒃ. ᐊᑐᓂᓗ ᓂᕈᐊᒐᒃᓴᓐᖑᖅᑎᑕᐅᔪᑦ ᓯᕗᓕᖅᑎᒃᓴᒧᑦ ᐅᖃᓪᓚᒍᓐᓇᖅᑎᑕᐅᓂᐊᖅᑐᑦ. ᒪᓕᒐᓕᐅᖅᑎᐅᔪᑦ ᓯᕗᓕᖅᑎᐅᓂᕐᒧᑦ ᐱᓇᓱᖏᑦᑐᑦ ᐊᐱᖅᓱᕈᓐᓇᕐᓂᐊᖅᑐᑦ ᓯᕗᓕᖅᑎᒃᓴᐅᓂᕐᒧᑦ ᓂᕈᐊᒐᒃᓴᐅᔪᓂᒃ. ᓇᓗᓇᐃᖅᑎᖅᓯᒪᑦᑎᐊᖅᑐᑦ ᒪᓕᒐᕆᔭᖏᑦ ᓂᕈᐊᖅᓯᓕᖅᑎᓪᓗᒋᑦ ᑐᓂᔭᐅᓂᐊᖅᑐᑦ ᓯᕗᓕᖅᑎᒃᓴᓂᒃ ᑲᑎᒪᔾᔪᑎᓂᐅᑉ ᐱᒋᐊᕐᓂᖓᓂ.

ᑲᑎᒪᔨᓕᒫᓐ ᐊᖏᖃᑎᒌᓚᐅᖅᑐᑦ ᒥᓂᔅᑕᐃᑦ ᑲᑎᒪᔨᖏᑦ ᐅᓄᕐᓂᖃᕐᓂᐊᕐᓗᑎᒃ 9−ᓂᒃ ᑲᑎᒪᔨᖃᕐᓗᑎᒃ (ᓯᕗᓕᖅᑎ ᐊᒻᒪ 8-ᓂᒃ ᒥᓂᔅᑕᖃᕐᓗᑎᒃ). ᑖᒃᑯᐊ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐊᒻᒪ ᐊᐅᓚᑦᑎᔩᑦ ᑲᑎᒪᔨᖏᑕ ᐱᖁᔭᕐᔪᐊᖏᑦ ᐱᕕᖃᖅᑎᑦᑎᕗᑦ ᓯᕗᓕᖅᑎᒥᒃ ᐃᓱᒪᖅᓱᕐᓗᑎᒃ ᒥᓂᔅᑕᕈᖅᑐᑦ ᒥᓂᔅᑕᐅᕝᕕᒋᓂᐊᖅᑕᖏᓐᓂᒃ ᑐᓂᐅᖅᑲᐃᓂᕐᒥᒃ.

ᑲᑎᒪᔾᔪᑎᖃᖅᑎᓪᓗᒋᑦ ᓄᓇᕗᒥ ᓯᕗᓕᖅᑎᓂᒃ ᑕᑯᒃᓴᐅᑎᑕᐅᓂᐊᖅᑐᑦ ᑕᓚᕖᓴᒃᑯᑦ ᓄᓇᓕᖕᓂ ᑕᓚᕖᓴᒃᑯᑦ ᑕᑯᒃᓴᐅᑎᑦᑎᕕᖏᓐᓂ ᐊᒻᒪᓗ ᐊᖏᕐᕋᕆᔭᐅᔪᓂ ᖃᖓᑦᑕᖅᑎᑕᐅᓯᒪᔪᒃᑯᑦ ᐱᑐᒍᑎᖃᖅᑐᑦ ᑕᐅᑐᒍᓐᓇᕐᓂᐊᖅᑐᑦ ᐅᕘᓇ Bell (ᓵᓄ 513−ᑯᑦ) ᑕᓚᕖᓴᒃᑯᑦ. ᑲᑎᒪᓂᕆᔭᐅᔪᑦ ᑕᑯᒃᓴᐅᓂᐊᕆᕗᑦ ᐃᕐᖐᓐᓇᖅ ᐅᕘᓇ: https://assembly.nu.ca/webcasts. ᐃᖃᓗᖕᒥᐅᑦ ᓈᓚᒍᓐᓇᕐᒥᔪᑦ ᐃᕐᖐᓐᓇᖅ ᑲᑎᒪᔪᓂᒃ ᓈᓚᐅᑎᒃᑯᑦ ᑐᓴᖅᓴᐅᑎᑕᐅᓂᐊᖅᑐᑦ ᐅᑯᑎᒎᓇᖅ FM−ᑯᑦ : ᑲᑎᒪᔪᑦ ᓇᑎᐊ: 92.5 / ᐃᓄᒃᑎᑐᑦ: 94.7 / ᖃᓪᓗᓈᑎᑐᑦ: 102.1.

-30-

ᑐᓴᒐᒃᓴᒃᑲᓐᓂᕐᓂᒃ ᐱᔪᒪᒍᕕᑦ ᐅᕙᓃᖅᑐᑦ:
LegInfo@assembly.nu.ca