Yes

ᐃᖃᓗᐃᑦ, ᓄᓇᕗᑦ (ᐅᑐᐱᕆ 31, 2018, 2018) - ᒪᓕᒐᓕᐅᕐᕕᐅᑉ ᑲᑎᒪᔨᖏᑦ ᐅᓪᓗᒥ ᓇᓗᓇᐃᖅᓯᖅᑲᐅᕗᑦ ᓄᓇᕗᒻᒥ ᐊᐅᓚᑦᑎᔨᐅᖃᑕᐅᓂᐊᖅᑐᒥᒃ ᑲᑎᒪᔾᔪᑎᖃᕐᓂᐊᕐᓂᕐᒥᖕᓂᒃ 2:30−ᒧᐊᖅᐸᑦ ᐅᓐᓄᓴᒃᑯᑦ ᐅᓪᓗᑐᐃᓐᓇᐅᓕᖅᐸᑦ, ᓄᕕᐱᕆ 2, ᐊᒻᒪ ᓂᕈᐊᕐᓗᑎᒃ ᐊᐅᓚᑦᓯᔩᑦ ᑲᑎᒪᔨᖏᓐᓅᖅᑐᒃᓴᒥᒃ.

ᓄᓇᕗᒻᒥ ᐊᐅᓚᑦᓯᔨᐅᖃᑕᐅᓂᐊᖅᑐᓂᒃ ᑲᑎᒪᔾᔪᑎᖃᕐᓂᖅ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᐊᓃᓐᓂᐊᖅᑐᖅ ᐊᒻᒪ ᑭᒃᑯᑐᐃᓐᓇᕐᓄᑦ ᒪᑐᐃᖓᓂᐊᖅᖢᓂ ᐳᓛᕆᐊᖅᓯᒪᔪᓃᓪᓗᑎᒃ. ᑕᒪᓐᓇ ᑲᑎᒪᓂᖅ ᑕᓚᕖᓴᒃᑯᑦ ᑕᑯᒃᓴᐅᑲᐅᑎᒋᓂᐊᖅᑐᖅ ᐊᒻᒪ ᖁᒻᒧᐊᒃᑎᑕᐅᓯᒪᔪᒃᑯᑦ Bell−ᑯᑦ (ᑕᑯᒃᓴᐅᕝᕕᐊ 513) ᐊᒻᒪ Shaw−ᑯᑦ (ᑕᑯᒃᓴᐅᕝᕕᐊ 289 - ᓄᑕᐅᓐᖏᑦᑐᒃᑯᑦ / ᑕᑯᒃᓴᐅᕝᕕᐊ 489 - ᓄᑖᖑᓂᖅᓴᒃᑯᑦ) ᑕᑯᒃᓴᐅᕝᕕᖏᑦᑎᒍᑦ.

-30-

ᑐᑭᓯᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:
ᔮᓐ ᑯᐊᒃ, ᒪᓕᒐᓕᐅᕐᕕᖕᒧᑦ ᑎᑎᕋᖅᑎ
ᐅᖄᓚᐅᑖ: (867) 975-5100

ᐃᖃᓗᐃᑦ, ᓄᓇᕗᑦ (ᐅᑐᐱᕆ 23, 2018) - ᐅᓪᓗᒥ ᒪᓕᒐᓕᐅᕐᕕᒃᒥ ᐊᖏᖅᑕᐅᖃᐅᕗᖅ ᐱᖁᔨᕗᖔᕈᑦ ᐊᑐᓕᖁᔨᕗᖔᕈᑕᐅᔪᖅ ᑖᓐᓇ ᒥᔅ ᑳᑐᕆᓐ ᐲᑐᓴᓐ, ᑯᐃᓐ ᒪᓕᒐᕐᓂᐊᖅᑎᖓ, ᑎᒃᑯᐊᖅᑕᐅᖁᓪᓗᒍ ᓄᓇᕗᒻᒧᑦ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᒧᑦ. ᑖᓐᓇ ᐱᖁᔨᕗᖔᕈᑦ ᐊᑕᖏᕐᖢᑎᒃ ᐊᑐᓕᖅᑎᑕᐅᖅᑲᐅᕗᖅ ᒪᓕᒐᓕᐅᕐᕕᖕᒥ.

ᓄᓇᕗᒻᒥ ᓱᓕᔪᕐᓇᕆᐊᖃᕐᓂᕐᒧᑦ ᐱᖁᔭᖅ ᐱᔭᕆᐊᖃᖅᑎᑦᑎᖕᒪᑦ ᑖᓐᓇ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇ ᐃᓕᓯᒪᓂᐊᖅᐳᖅ ᐅᑭᐅᓄᑦ ᑕᓪᓕᒪᓄᑦ (5). ᒥᔅ ᐲᑐᓴᓐ ᑎᒃᑯᐊᖅᑕᐅᓯᒪᓂᖓ ᐊᑐᓕᖅᐳᖅ ᒫᓐᓇᑲᐅᑎᒋᒃ.

ᔫᓂᐅᑎᓪᓗᒍ ᑕᒫᓂ ᐊᕐᕌᒍᒥ, ᑲᑎᒪᔨᓕᕆᓂᕐᒧᑦ ᑲᑎᒪᔩᑦ ᑕᕝᕙᖖᒐᑦ ᒪᓕᒐᓕᐅᕐᕕᖕᒥᑦ ᑭᒃᑯᓕᒫᓂᒃ ᑐᖖᒐᓱᒃᑎᑦᑎᓚᐅᖅᐳᑦ ᐱᔪᒪᔾᔪᑎᓂᒃ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᐅᑉ ᐃᓂᖓᓄᑦ.

ᐃᖃᓗᐃᑦ, ᓄᓇᕗᑦ) ᔫᓂ 14, 2018) - ᓄᑖᒃ ᓯᕗᓕᖅᑎᐅᓂᐊᖅᑐᓄᑦ ᐊᒻᒪᓗ ᐊᐅᓚᑦᓯᔨᑦ ᑲᑎᒪᔨᖏᓐᓄᑦ ᐃᓚᒋᔭᐅᓂᐊᖅᑑᒃ ᐅᓪᓗᒥ ᓂᕈᐊᖅᑕᐅᖅᑲᐅᖕᒪᑎᒃ ᓄᓇᕗᒥ ᓯᕗᓕᖅᑎᓂᒃ ᑲᑎᒪᔾᔪᑎᖃᕐᓂᒃᑯᑦ. ᑲᑎᒪᖃᑕᐅᓪᓗᑎᒃ ᐃᓘᓐᓇᖏᑦ ᒪᓕᒐᓕᐅᖅᑎᐅᔪᑦ.

ᔫ ᓴᕕᑲᑖᖅ ᓂᕈᐊᖅᑕᐅᖅᑲᐅᔪᖅ ᓯᕗᓕᖅᑎᐅᓂᕐᒧᑦ.

ᔪᐊᔾ ᕼᐃᒃᔅ ᓂᕈᐊᖅᑕᐅᖅᑲᐅᔪᖅ ᐊᐅᓚᑦᓯᔨᑦ ᑲᑎᒪᔨᖏᓐᓄᑦ ᐃᓚᒋᔭᐅᓂᐊᕐᓗᓂ.

ᒪᓕᒐᓕᐅᖅᑎᑦ ᑲᑎᒪᔨᖏᑕ ᐊᒻᒪᓗ ᐊᐅᓚᑦᓯᔨᑦ ᑲᑎᒪᔨᖏᑕ ᐱᖁᔭᕐᔪᐊᖓ ᒪᓕᒐᖃᖅᑎᑦᑎᖕᒪᑦ ᓯᕗᓕᖅᑎ ᐃᓱᒪᖅᓱᕐᓂᖓᓂᒃ ᑐᓂᓯᐅᖅᑲᐃᓂᕐᒥᒃ ᒥᓂᔅᑕᐃᑦ ᑲᒪᒋᓂᐊᖅᑕᖏᓐᓂᒃ ᒥᓂᔅᑕᐅᕝᕕᒋᓗᒋᑦ.

ᐱᖁᔨᕗᖔᕈᑎᒃᑯᑦ ᓇᓗᓇᐃᖅᑕᐅᓂᐊᖅᑐᑦ ᑎᒃᑯᐊᖅᑕᐅᓂᕆᔭᖏᑦ ᒪᓕᒐᓕᐅᖅᑎᑦ ᑲᑎᒪᕐᔪᐊᕐᓂᖓ ᐱᒋᐊᒃᑲᓐᓂᖅᐸᑦ ᐅᓐᓄᒃ.

-30-

ᑐᓴᒐᒃᓴᒃᑲᓐᓂᕐᓂᒃ ᐱᔪᒪᒍᕕᑦ ᑐᓴᖅᑎᓪᓗᒍ:

ᔮᓐ ᑯᐊᒃ, ᑎᑎᕋᖅᑎ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ

ᐅᖄᓚᐅᑖ: (867) 975-5100

ᐃᖃᓗᐃᑦ, ᓄᓇᕗᑦ (ᒪᐃ 29, 2018) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᐊᒻᒪ ᐃᒃᓯᕙᐅᑕᕆᔭᐅᔪᖅ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᖃᐅᔨᒪᔨᑕᑦ ᑲᑎᒪᔨᖏᓐᓄᑦ, ᔫᓯᐱ ᐃᓄᒃ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᐸᑎ ᐳᕉᔅᑐ ᐊᒻᒪ ᓘᑎ ᐸᓪᓗᖅ ᐅᔭᒥᒃᑕᐅᓂᐊᕐᓂᖏᓐᓂᒃ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ, ᐊᒻᒪ ᐅᔭᒥᒃᑕᐅᓂᐊᖅᖢᑎᒃ ᐊᐃᑉᐹᓂ, ᔫᓂ 5, 2018−ᒥ, 6−ᒧᐊᖅᐸᑦ ᐅᓐᓄᒃᑯᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ.

ᐃᓕᓴᕆᔭᐅᓂᐊᖅᑑᒃ ᐅᔭᒥᒃᑕᐅᓕᖅᐸᑕ ᑭᒃᑯᑐᐃᓐᓇᕐᓄᑦ ᑕᑯᔭᖅᑐᖅᑕᐅᔪᓐᓇᕐᓂᐊᖅᑐᑦ ᐊᒻᒪ ᓄᓇᕗᓕᒫᒥ ᑕᓚᕖᓴᒃᑯᑦ ᑕᑯᒃᓴᐅᑲᐅᑎᒋᓂᐊᖅᖢᑎᒃ ᓄᓇᓕᖕᓂ ᐊᒻᒪ ᖁᒻᒧᐊᒃᑎᑕᐅᓯᒪᔪᒃᑯᑦ, Bell (ᑕᑯᒃᓴᕈᕈᑖ 513) ᐊᒻᒪ Shaw (ᑕᑯᒃᓴᕈᕈᑖ 289 - ᓄᑕᐅᓐᖏᑦᑐᖅ / ᑕᑯᒃᓴᕈᕈᑖ 489 − ᓄᑖᑦ).

ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 3, 2018) - ᒪᓕᒐᓕᐅᕐᕕᐅᑉ ᓇᐅᑦᑎᖅᓱᖅᑎᐅᔪᑦ ᒐᕙᒪᒃᑯᑦ ᑮᓇᐅᔭᖅᑐᕈᑎᕕᓂᖏᓐᓄᑦ ᐃᒻᒥᒃᑰᖅᑐᑦ ᑲᒪᔨᐅᔪᓄᑦ ᐊᒻᒪ ᐊᓯᖏᓐᓄᑦ ᑎᒥᐅᔪᓄᑦ ᑲᑎᒪᔨᕋᓛᖁᑎᖏᑦ ᐅᓪᓗᒥ ᓇᓗᓇᐃᖅᓯᕗᑦ ᑕᓚᕖᓴᒃᑯᑦ ᑕᑯᒃᓴᐅᑲᐅᑎᒋᓗᑎᒃ ᓈᓚᒍᑎᖃᕐᓂᐊᕐᓂᕐᒥᖕᓂᒃ ᒪᓕᒐᓕᐅᕐᕕᖕᒧᑦ ᑲᓇᑕᒥ ᑕᒻᒪᖅᓯᒪᔪᖅᓯᐅᖅᑎᐅᑉ 2018−ᒥ ᐅᓂᒃᑳᓕᐊᕕᓂᖏᓐᓂᒃ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐱᔾᔪᑎᓕᖕᓂᒃ ᐊᒻᒪ ᓈᓚᖕᓂᖃᕐᓂᐊᖅᖢᑎᒃ ᐊᐃᕐᕆᓕ 30, 2018−ᒥᑦ ᒪᐃ 1, 2018−ᒧᑦ ᑎᑭᓪᓗᒍ.

ᐃᖃᓗᐃᑦ, ᓄᓇᕗᑦ (ᒫᔾᔨ 19, 2018) - ᐅᖃᖅᑎᑦᓯᔨ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ ᐊᒻᒪᓗ ᐃᒃᓯᕙᐅᑕᕆᔭᐅᔪᖅ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎᓄᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᓐᓄᑦ ᔫᓯᐱ ᐃᓄᒃ ᐅᓪᓗᒥ ᑐᓴᖅᑎᑦᑎᖃᐅᔪᖅ ᑐᓂᔭᐅᓂᐊᕐᓂᖏᓐᓂᒃ ᐊᕐᕌᒍᒋᔭᑦᑎᓐᓂ ᐱᐊᑎ ᐳᕉᔅᑐ ᐊᒻᒪᓗ ᓘᑎ ᐸᓪᓗᖅ ᐃᓕᓴᕆᔭᐅᔾᔪᑎᓂᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎᐅᕙᒃᑐᒥᒃ.

ᔮᓐᓄᐊᕆ 1, 2010−ᖑᑎᓪᓗᒍ, ᐱᖁᔭᕐᔪᐊᖅ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎ ᐊᑐᓕᖅᑎᑕᐅᓚᐅᖅᓯᒪᔪᖅ. ᑐᕌᒐᒃᓴᕆᔭᖓ ᐃᓕᓴᕆᔭᐅᔾᔪᑎᐅᑉ ᐃᓕᓴᖅᓯᖁᓪᓗᒋᑦ ᑭᓇᒃᑯᑐᐃᓐᓇᕐᓂᒃ ᐱᓕᕆᑦᑎᐊᖅᓯᒪᔪᓄᑦ ᐃᑲᔪᖅᓯᓪᓗᑎᒃ ᓄᓇᕗᒥᒃ. ᐃᓕᓴᕆᔭᐅᔾᔪᑎ ᑖᓐᓇ ᖁᕝᕙᓯᖕᓂᖅᐹᖑᓪᓗᓂ ᓄᓇᕗᒥ ᐃᓕᓴᕆᔭᐅᔾᔪᑎᐅᕗᖅ ᐊᒻᒪᓗ ᐊᓯᖏᓐᓂᑦ ᐃᓕᓴᕆᔭᐅᔾᔪᑎᓂᑦ ᖁᑦᑎᖕᓂᖅᐹᖑᓪᓗᓂ, ᐅᔭᒥᖕᓂᑦ ᐅᕝᕙᓘᓐᓃᑦ ᓴᒡᕕᖕᒥᖕᓂᑦ ᑐᓂᔭᐅᕙᒃᑐᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ.

ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2018) - ᓄᓇᕗᑦ ᒪᓕᒐᓕᐅᕐᕕᐊᑕ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐃᓱᓕᑦᑎᓚᐅᖅᐳᑦ ᒥᑦᑎᒪᑕᓕᖕᒥ ᐊᕗᑎᓯᒪᓪᓗᑎᒃ ᑲᑎᒪᓂᕐᒥᓂᒃ ᕕᕗᐊᕆ 23, 2018−ᖑᑎᓪᓗᒍ.