ᓯᕗᓕᖅᑎᐅᖃᑕᐅᔪᖅ ᐋᕐᓗᖅ ᒪᐃᓐ

ᐋᕐᓗᖅ ᒪᐃᓐ ᓂᕈᐊᖅᑕᐅᓕᖅᑭᔪᔪᖅ ᐃᓕᔭᐅᑐᐃᓐᓇᖅᑐᓂ ᑭᒡᒐᑐᕐᓂᐊᕐᓗᓂ ᐊᕐᕕᐊᑦ ᐅᐊᓐᓇᖓᓂᒃ ᑎᑭᕋᕐᔪᐊᒥᓪᓗ 6−ᖓᓐᓂ ᓄᓇᕗᑦ ᒪᓕᒐᓕᐅᕐᕕᐅᑉ. ᐋᕐᓗᖅ ᒪᐃᓐ ᓂᕈᐊᖅᑕᐅᔪᒻᒥᔪᖅ ᓯᕗᓕᖅᑎᑦ ᑲᑎᒪᔨᖏᓐᓄᑦ ᓅᕕᐱᕆ 17, 2021ᒥ, ᓂᕈᐊᕐᓂᖃᖅᑎᓪᓗᒋᑦ ᓯᕗᓕᖅᑎᑦᓴᓂᒃ. ᐊᖏᖅᑎᑕᐅᓕᓚᐅᖅᑐᖅ ᐃᓂᒥᓄᑦ ᓅᕕᐱᕆ 19, 2021ᒥ. ᑭᒡᒐᑐᐃᓂᐊᓕᖅᑐᖅ ᓯᕗᓕᖅᑎᒋᔭᐅᓗᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ. ᐋᕐᓗᖅ ᒪᐃᓐᓯᕗᓂᐊᓂ ᒪᓕᒐᓕᐅᖅᑎᑐᐃᓐᓇᐅᓚᐅᖅᑐᖅ ᑕᓪᓕᒪᖓᓐᓂ ᒪᓕᒐᓕᐅᕐᕕᐅᑉ, ᐃᒃᓯᕙᐅᑕᐅᕙᓚᐅᖅᑐᓂ ᑲᑎᒪᔨᕋᓛᓄᑦ ᒪᓕᒐᓕᕆᓂᕐᒥᒃ, ᐃᒃᓯᕙᐅᑕᐅᓪᓗᓂᓗ ᕿᒥᕐᕈᒋᐊᒃᑲᓐᓂᓂᕐᒧᑦ ᒐᕙᒪᒃᑯᑦ ᐊᐅᓚᓂᖏᓐᓂᒃ ᐊᒻᒪᓗ ᖃᓄᐃᑦᑐᑦᓴᐅᓂᖏᓐᓂᒃ ᐊᒻᒪᓗ ᐃᒃᓯᕙᐅᑕᐅᒋᓪᓗᓂ ᑲᑎᒪᔨᑐᐃᓐᓇᐃᑦ ᑲᑎᒪᔨᖏᓐᓂ. ᐋᕐᓗᖅ ᒪᐃᓐ ᐱᕈᖅᓴᓂᑰᔪᖅ ᐊᕐᕕᐊᓂ. ᐱᐊᓂᒃᑲᒥ ᐃᓕᓐᓂᐊᕐᕕᐊᓗᖕᒥ, ᐃᓕᓐᓂᐊᕆᐊᓚᐅᖅᓯᒪᔪᖅ ᓚᐅᓐ ᐋᓕᓴᓐ ᐃᓕᓴᕐᕕᔾᔪᐊᖓᓂ (Mount Allison University), ᐱᐊᓂᒃᖢᓂ 2002ᒥ ᐃᓕᑕᕆᔭᐅᔾᔪᑎᒥᒃ ᑮᓇᐅᔭᓕᐅᕈᑎᒃᓴᓕᕆᓂᕐᒥᒃ. ᐋᕐᓗᖅ ᒪᐃᓐ ᑲᓇᑕᐅᑉ ᓯᓚᑖᓂ ᐃᓕᓐᓂᐊᖅᓯᒪᓂᖓ ᐱᖃᓯᐅᑎᓯᒪᔪᖅ ᐃᓕᓐᓂᐊᕐᓇᒥ ᐋᔅᓗ, ᓄᐊᐅᐃ-ᒥ, ᐊᒻᒪᓗ ᐱᓕᒻᒪᓴᒃᓯᓐᓈᖅᖢᓂ ᓄᓇᕐᔪᐊᕐᒥ ᑲᑐᔾᔨᖃᑎᒌᒃᑯᑦ ᑎᒥᖁᑎᖓᓐᓂ ᐃᓕᓐᓂᐊᕐᓂᕐᒧᑦ, ᖃᐅᔨᓴᓐᓂᕐᒧᓪᓗ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᐅᕆᔅ, ᕗᕌᓐᓯᒥ. ᐋᕐᓗᖅ ᒪᐃᓐ ᐃᖅᑲᓇᐃᔮᖃᖃᑦᑕᕐᓂᑰᔪᖅ. ᑏᕖᒃᑯᑦ ᐱᕙᓪᓕᐊᔪᓕᕆᔨᐅᓯᒪᓪᓗᓂ ᓰᐲᓰ−ᑯᓐᓂ ᐅᑭᐅᖅᑕᖅᑐᒥ, ᐱᕙᓪᓕᐊᔪᓕᕆᔨᐅᓯᒪᓪᓗᓂᓗ ᐊᕐᕕᐊᑦ ᕼᐋᒻᓚᒃᑯᖏᓐᓂ ᐊᒻᒪᓗ ᐊᕕᑦᑐᖅᓯᒪᓂᕐᒥ ᐱᔭᑦᓴᓕᕆᔨᐅᓪᓗᓂ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖓᓐᓄᑦ, ᓂᕈᐊᖅᑕᐅᓚᐅᕋᓂ ᓱᓕ, ᐋᕐᓗᖅ ᒪᐃᓐ ᓇᒻᒥᓂᖁᑎᖃᓚᐅᖅᓯᒪᔪᖅ ᐱᕙᓪᓕᐊᔪᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ. ᐋᕐᓗᖅ ᒪᐃᓐ ᐊᖏᔪᖅᑳᕆᔭᐅᓯᒪᒻᒥᔪᖅ ᑭᕙᓪᓕᕐᒥ ᓇᒻᒥᓂᖁᑎᖃᖅᑐᐃᑦ ᑲᑐᔾᔨᖃᑎᒌᒃᑯᓐᓂ ᐊᒻᒪᓄᓗ ᑲᑎᒪᔨᐅᖃᑕᐅᓂᑰᓪᓗᓂ ᓄᓇᕗᑦ ᐱᕙᓪᓕᐊᔪᓕᕆᐱᓂᕐᒧᑦ ᑯᐊᐸᕇᓴᒃᑯᓐᓂ. ᐋᕐᓗᖅ ᒪᐃᓐ ᐱᓇᓱᒻᒪᕆᓐᓂᑰᔪᖅ ᐊᑭᓕᖅᓱᖅᑕᐅᒐᓂ ᐃᓄᒻᒪᕆᑦ ᓂᔾᔭᐅᓯᔭᓐᓂᕐᒧᑦ ᑲᑎᓐᓂᐅᕙᑦᑐᒥᒪ ᐊᕐᕕᐊᓂᓗ ᑕᕐᕆᔭᐅᓯᓕᕆᔨᖏᓐᓂ, ᕼᐅᕙᒎᖅ ᓈᓚᐅᓯᓕᕆᔨᓄᑦ ᐊᒻᒪᓗ ᐅᕕᒃᑲᐃᑦ ᕼᐋᑭᖅᑎᖏᓐᓄᑦ ᐊᕐᕕᐊᓂ ᖃᒪᓂᑦᑐᐊᕐᒥᓗ. ᐋᕐᓗᖅ ᐊᒻᒪᓗ ᐊᒫ ᒪᐃᓐ ᕿᑐᕐᖓᖃᖅᑑᒃ ᐊᒡᒐᔅᑕᔅ, ᒪᐃᕝ ᐊᒻᒪᓗ ᐅᑎᓐ. ᐋᕐᓗᖅ ᒪᐃᓐ ᐱᒃᑯᒋᔭᖃᖅᑐᖅ ᐊᖑᓇᓱᓐᓂᕐᒥᒃ, ᐃᖃᓗᒐᓱᓐᓂᒥᓪᓗ, ᓄᑦᑕᓂᕐᒥᒃ ᐊᒻᒪᓗ ᐱᓐᖑᐊᖅᑎᐅᓂᕐᒥᒃ.