ᑲᑎᒪᔨᕋᓛᑦ ᖃᐅᔨᒃᑲᖅᓯᕗᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ

ᐃᖃᓗᐃᑦ, ᓄᓇᕗᑦ (ᐄᐳᕈ 8, 2024) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖏᑦ ᓇᐅᑦᓯᖅᑐᖅᑎᐅᔪᑦ ᒐᕙᒪᒃᑯᑦ ᐊᐅᓚᓂᖏᓐᓂᑦ ᑮᓇᐅᔭᖅᑐᕈᑎᖏᓐᓂᓪᓗ ᑕᓚᕖᓴᒃᑰᕐᑕᐅᑎᒋᓗᑎᒃ ᓈᓚᓐᓂᖃᖅᑎᑦᑎᓂᖃᓛᕐᒪᑕ ᐄᐳᕈ 19-ᒥᑦ−20-ᒧᑦ, 2024-ᒥ, ᕿᒥᕐᕈᓂᖃᕐᓗᑎᒃ ᒫᓐᓇᓕᓴᐅᓛᖑᔪᓂᑦ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑲᓕᐊᒥᓂᐅᔪᓂᑦ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᔫᑉ ᓄᓇᕗᒻᒥ ᐊᒻᒪᓗ ᐄᐳᕈ 22-ᒥᑦ−23-ᒧᑦ, 2024ᒥ, ᕿᒥᕐᕈᓂᖃᕐᓗᑎᒃ ᒫᓐᓇᓕᓴᐅᓛᖑᔪᓂᑦ ᐊᕐᕋᒍᑕᒫᖅᓯᐅᑎᓂᒃ ᐅᓂᒃᑲᓕᐊᒥᓂᐅᔪᓂᑦ ᑭᒡᒐᖅᑐᐃᔨᐅᔪᒧᑦ ᓱᕈᓯᕐᓄᑦ ᒪᒃᑯᑦᑐᓄᓪᓗ.

ᐊᖏᔪᖅᑳᒡᒍᑏᑦ ᓄᓇᕗᑦ ᒐᕙᒪᖓᓃᓐᖔᖅᑐᑦ ᓴᖅᑭᔮᓛᕐᒥᔪᖅ ᑭᐅᔭᖅᑐᖅᓯᒪᓗᑎᒃ ᑕᓚᕖᓴᒃᑯᑦ ᓈᓚᓐᓂᖃᖅᑎᑦᑎᓂᐅᔪᓄᑦ.

“ᑕᓚᕖᓴᒃᑰᖅᑐᑕ ᓈᓚᓐᓂᖃᖅᑎᑦᑎᓂᕗᑦ ᐱᕕᖃᖅᕕᐅᓛᕐᒪᑕ ᒪᓕᒐᓕᐅᖅᑐᕝᑎᐅᔪᓄᑦ ᒪᓕᒐᓕᐅᖅᕕᒻᒥ ᐃᓱᒪᒃᓴᖅᓯᐅᕈᑎᖃᕈᓐᓇᕐᓗᑎᒃ ᖃᓄᑎᒋ ᓄᓇᕗᑦ ᒐᕙᒪᖓ ᐱᓕᕆᒋᐊᖅᓯᒪᒻᒪᖔᖅ ᐱᓕᕆᐊᖃᕋᓱᐊᖅᑐᑎᒃ ᐊᑐᓕᖁᔭᓕᐊᒥᓂᐅᔪᓂᑦ ᑖᒃᑯᓄᖓ ᐃᒻᒥᒃᑰᖅᑐᑎᒃ ᐱᓕᕆᔨᐅᔪᓄᑦ ᒪᓕᒐᓕᐅᖅᕕᒻᒧᑦ ᐊᒻᒪᓗ ᑲᑎᒪᔨᕋᓛᑦ ᐊᑐᓕᖁᔭᓕᐊᕆᓯᒪᔭᖓᖏᓐᓂᑦ,” ᐅᖃᖅᑐᖅ ᑲᑎᒪᔨᕋᓛᑦ ᐃᒃᓯᕙᐅᑕᖓ ᔪᐊᔾ ᕼᐃᒃᔅ, ᒪᓕᒐᓕᐅᖅᑎᐅᔪᖅ ᐃᖃᓗᐃᑦ−ᑕᓯᓗᒻᒧᑦ.

ᑐᓴᐅᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᑉ ᒫᓐᓇᓕᓴᐅᓛᖁᑎᖏᑦ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐊᒥᓃᑦ ᖃᕋᓴᐅᔭᒃᑯᑦ ᐲᔭᖅᑕᐅᔪᓐᓇᖅᑐᑦ ᐅᑯᓇᓐᖓᑦ ᖃᕋᓴᐅᔭᒃᑯᑦ ᑐᕌᕈᑏᓐᓂᑦ: www.assembly.nu.ca ᐊᒻᒪᓗ www.atipp-nu.ca

ᑭᒡᒐᖅᑐᐃᔨᐅᔫᑉ ᓱᕈᓯᕐᓄᑦ ᒪᒃᑯᑦᑐᓄᓪᓗ ᒫᓐᓇᓕᓴᐅᓛᖁᑎᖏᑦ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐊᒥᓃᑦ ᖃᕋᓴᐅᔭᒃᑯᑦ ᐲᔭᖅᑕᐅᔪᓐᓇᖅᑐᑦ ᐅᑯᓇᓐᖓᑦ ᖃᕋᓴᐅᔭᒃᑯᑦ ᑐᕌᕈᑏᓐᓂᑦ: www.assembly.nu.ca ᐊᒻᒪᓗ www.rcynu.ca

ᑲᑎᒪᔨᕋᓛᑦ ᑕᓚᕖᓴᒃᑰᖅᑐᑎᒃ ᓈᓚᓐᓂᖃᖅᑎᑦᑎᓂᖏᑦ ᐱᒋᐊᓛᖅᑐᑦ 09:00−ᒥ ᐅᓪᓛᒃᑯᑦ ᑲᑎᒪᕐᔪᐊᖅᕕᖓᓂ ᒪᓕᒐᓕᐅᖅᕕᐅᑉ ᑕᓪᓕᕐᒥᐅᓕᖅᑲᑦ, ᐄᐳᕈ 19, 2024-ᒥ. ᑖᒃᑯᐊ ᓈᓚᓐᓂᖃᖅᑎᑦᑎᓂᐅᔪᑦ ᑕᓚᕖᓴᒃᑯᑦ ᑕᑯᒃᓴᐅᓛᖅᑐᑦ ᓄᓇᓕᓐᓂ ᑲᓱᖅᓯᒪᔪᓂᑦ ᑕᓚᕖᓴᖃᖅᑐᓄᑦ  ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᓕᓐᓄᑦ ᕕᐊᒃᑯᑎᒍᑦ (ᓈᓴᐅᑖ 513) ᐊᒻᒪᓗ ᓵᒃᑯᑦ (ᓈᓴᐅᑖ ᐱᑐᖃᐅᓂᖅᓴᒃᑯᑦ 289 − / ᓈᓴᐅᑖ 489 ᓄᑖᖑᓂᖅᓴᒃᑯᑦ) ᓴᖅᑭᔮᖅᕕᖏᒍᑦ. ᓈᓚᓐᓂᖃᖅᑎᑦᑎᔪᑦ ᑕᕝᕙᑦᑕᐅᑎᒋ ᑕᑯᒃᓴᐅᔪᓐᓇᓛᖅᑐᑦ ᐅᕙᓂ:

https://assembly.nu.ca/webcasts. ᐃᖃᓗᒻᒥᐅᑕᑦ ᓈᓚᒍᓐᓇᓛᕐᒥᔪᑦ ᓈᓚᐅᑎᒃᑯᑦ ᑐᓴᖅᓴᐅᑦᑕᐅᑎᒋᔪᓂᑦ ᓈᓚᓐᓂᖃᖅᑎᑦᑎᔪᓂᑦ ᐅᑯᓅᓇ ᓈᓚᐅᑏᑦ ᑐᓴᖅᓴᐅᕕᖏᓐᓂ FM−ᒥ: ᐅᖃᖅᑐᓕᒫᑦ ᑕᒪᒃᑮᓐᓂ ᐅᖃᐅᓰᓐᓂ: 92.5 / ᐃᓄᒃᑎᑐᑦ: 94.7 / ᖃᓪᓗᓈᑎᑐᑦ: 102.1.

-30-

ᑐᑭᓯᒋᐊᕈᒪᒍᒃᓯ ᖃᕋᓴᐅᔭᒃᑯᑦ ᐅᕗᓐᖓᕈᓐᓇᖅᑐᓯ:
LegInfo@assembly.nu.ca