ᐊᕿᒡᒋᖅ

rock ptarmiganᐊᒥᓱᑦ ᑎᖕᒥᐊᑦ ᐅᑭᐊᒃᓴᖅᐸᓪᓕᐊᓕᑐᐊᕌᖓᑦ ᖃᓪᓗᓈᑦ ᓄᓇᖓᓐᓄᑦ ᐊᐅᓪᓚᖅᐸᒃᑎᓪᓗᒋᑦ, ᐊᕿᒡᒌᑦ ᐅᑭᐅᖅᑕᖅᑐᕐᒥᐅᑕᓪᓚᕆᐊᓘᒐᒥᒃ  ᓄᓇᕘᒦᖏᓐᓇᖃᑦᑕᕐᑐᑦ ᐅᑭᐅᓕᒫᖅ. ᐃᓄᐃᑦ ᐅᖃᐅᓯᖏᑎᒍᑦ ᑕᒪᒃᑯᐊ ᑎᖕᒥᐊᑦ ᐊᕿᒡᒋᕐᒥᒃ ᑕᐃᔭᐅᓲᑦ, ᐊᒻᒪᓗ ᐊᕿᒡᒌᑦ ᐅᑭᐅᖅᑕᖅᑐᓕᒫᒥ ᓄᓇᕐᔪᐊᑉ  ᑲᔾᔨᖓᓐᓃᖃᑕᐅᔪᓂ ᑕᑯᔭᐅᓲᖑᓪᓗᑎᒃ, ᐅᓂᒃᑳᖅᑐᐊᓂᓗ ᑕᐃᔭᐅᖃᓯᐅᔾᔭᐅᓯᒪᕙᒃᖢᑎᒃ, ᑎᑎᕋᐅᔭᖅᑕᐅᕙᒃᖢᑎᒃ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᓂᕿᒋᔭᐅᓪᓗᑎᒃ. ᐊᓯᖏᓐᓂᒃ ᑎᖕᒥᐊᓂᑦ ᐊᕿᒡᒌᑦ ᐊᔾᔨᐅᓐᖏᓛᖑᔪᑦ, ᐱᖓᓱᓂᒃ ᐊᔾᔨᒌᖏᑦᑐᓂᒃ ᓱᓗᖃᐅᕐᒪᑕ, ᐊᓯᖏᑦ ᑎᖕᒥᐊᑦ ᒪᕐᕈᐃᓐᓈᖕᓂᒃ ᐊᔾᔨᒌᓐᖏᑦᑐᓂᒃ ᓱᓗᖃᐅᖅᑎᓪᓗᒋᑦ, ᐅᑭᐅᒃᑯᓪᓗ ᐊᒃᓱᕈᕐᓇᕐᓂᖅᐹᖑᓲᖑᓪᓗᓂ ᐊᑭᒡᒋᕐᓄᑦ, ᐊᐱᓯᒪᑎᓪᓗᒍ ᐊᒻᒪᓗ ᐊᓄᕌᑲᑕᖃᑦᑕᓕᖅᑎᓪᓗᒍ ᐊᔪᕐᓇᕐᓂᖅᐹᖑᓲᖑᖕᒪᑦ  ᓂᕿᒃᓴᖅᓯᐅᕋᓱᒃᑎᓪᓗᒋᑦ ᐅᖂᑕᒃᓴᖅᓯᐅᕋᓱᒃᑎᓪᓗᒋᓪᓗ.


ᐅᑭᐅᒃᑯᑦ ᐊᕿᒡᒌᑦ ᖃᑯᖅᑕᐅᓕᓲᖑᔪᑦ ᑕᑯᔭᐅᓴᕋᐃᓐᓂᐊᓐᖏᓐᓇᒥᒃ, ᐊᒻᒪᓗ ᐊᕿᒡᒌᑦ ᑯᑭᖕᒥᓄᑦ ᐊᒡᒐᒃᖢᑎᒃ ᐱᕈᖅᑐᕕᓂᖅᓯᐅᓲᑦ ᐊᐳᒻᒧᑦ ᓴᐅᔭᐅᓯᒪᔪᓂᒃ, ᐊᐅᐱᓚᑦᑐᓐᖑᐊᖅᓯᐅᖅᖢᑎᒃ ᐊᒻᒪᓗ ᐊᓯᖏᓐᓂᒃ ᓂᕆᔭᒃᓴᒥᖕᓂᒃ ᕿᓂᖅᖢᑎᒃ. ᐊᕿᒡᒌᑦ ᑕᐅᑦᑐᖏᑦ ᐅᑭᐅᖅᑕᖅᑑᑉ ᐋᖅᑭᐅᒪᓂᖓᓄᑦ ᐃᓕᖅᑭᓯᒪᑦᑎᐊᖅᑐᑦ, ᑕᐃᒫᑐᐃᓐᓇᖅ ᐃᓄᐃᑦ ᐃᓕᖅᑭᓯᒪᑦᑎᖅᑎᒋᖕᒪᑕ ᐅᑭᐅᖅᑕᖅᑑᑉ ᐋᖅᑭᐅᒪᓂᖓᓄᑦ. ᐊᕿᒡᒌᑦ ᓯᒡᒍᖓᑕ ᑎᕆᖅᑯᖓᓂ ᐱᒋᐊᖅᑐᒥᒃ ᕿᕐᓂᖅᑕᒥᒃ ᑕᖅᓴᓖᑦ ᐊᒻᒪᓗ ᑕᖅᓴᖃᕆᓪᓗᑎᒃ ᐃᔨᖏᑦᑕ ᓇᓛᒎᖓᔪᒥᒃ ᓴᓂᒧᑦ ᕿᓂᕐᒥᔪᒥᒃ, ᑕᐃᒫᑐᐃᓐᓇᖅ ᓲᕐᓗ ᐃᓄᐃᑦ ᐃᒡᒐᒋᕙᓚᐅᖅᑕᖏᑦᑎᑐᑦ ᑕᐅᑦᑐᓕᖕᒥᒃ, ᐃᓄᐃᑦ ᐃᒡᒐᖕᓂᒃ ᐊᑐᖅᐸᓚᐅᖅᓯᒪᖕᒪᑕ ᐃᓪᓗᓕᕐᓂᐊᓐᖏᓐᓇᒥᒃ ᐅᐱᕐᖔᒃᑯᑦ. ᐊᕿᒡᒌᑦ ᐃᓯᒐᔮᖏᑦ ᒥᖅᑯᖃᕐᒥᔪᑦ ᐳᑐᒍᖏᓐᓄᑦ ᑎᑭᑦᑐᓂᒃ, ᐃᓯᒐᔮᖏᑦ ᐅᖅᑰᓂᐊᕐᒪᑕ ᐊᒻᒪᓗ ᒪᐅᔭᓯᐅᕐᓂᐊᓐᖏᒻᒪᑕ. ᐊᒻᒪᓗ ᐅᑭᐅᓪᓚᕆᒃᑯᑦ ᐊᕿᒡᒌᑦ ᐊᐳᒻᒥᒃ ᐅᖅᑯᐊᖃᓲᑦ, ᑕᐅᓄᖓ ᐃᑎᖅᓴᓕᐅᖅᓯᒪᓪᓗᑎᒃ ᐅᖅᑯᐊᖃᕐᓂᐊᕋᒥᒃ ᐊᒻᒪᓗ ᐃᔨᖅᓯᒪᔪᓐᓇᕐᓂᐊᕋᒥᒃ ᐊᕿᒡᒋᕐᓂᐊᖅᐸᒃᑐᓂᑦ, ᓲᕐᓗ ᑎᕆᒐᓂᐊᕐᓂᑦ ᐊᒻᒪᓗ ᐊᓯᖏᓐᓂᑦ. ᑕᐃᒫᒃ ᐊᕿᒡᒌᑦ ᐅᑭᐅᖅᑕᖅᑐᒥᐅᓄᑦ ᐃᓕᖅᑭᒃᓯᒪᓂᖏᑦ ᐱᔾᔪᑕᐅᓪᓗᑎᒃ ᐅᑭᐅᖅᑕᖅᑐᒧᑦ ᓇᓗᓇᐃᒃᑯᑕᖅᑖᕆᔭᐅᓯᒪᔪᑦ - ᐊᒻᒪᓗ ᓄᓇᕘᒥᐅᓄᑦ ᑎᖕᒥᐊᓂᑦ ᓇᓗᓇᐃᒃᑯᑕᖅᑖᕆᔭᐅᓯᒪᓪᓗᑎᒃ.