ᐱᖁᔭᒃᓴᐃᑦ ᐊᒻᒪ ᐱᖁᔭᐃᑦ

ᐱᖁᔭᒃᓴᐃᑦ ᑲᒪᒋᔭᐅᓂᖏᑕ ᐃᖏᕐᕋᓂᖓ ᓄᓇᕗᒥ ᐊᔾᔨᑐᐃᓐᓇᕆᔭᐅᑲᓴᒃᐳᖅ ᐱᖁᔭᓕᐅᖅᑎᕐᔪᐊᑦ ᐱᖁᔭᓕᐅᖅᑎᓪᓗᒋᑦ ᐃᖏᕐᕋᓂᕆᕙᒃᑕᖓᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᐊᒡᒍᖅᑐᕐᓯᒪᓂᕐᓂ ᐊᒻᒪ ᐅᑭᐅᖅᑕᖅᑐᕐᒥᐅᑦ ᒪᓕᒐᓕᐅᕐᕕᖏᓐᓂ.  ᑕᐃᒪᓕ ᐱᖁᔭᓐᖑᖅᑎᑕᐅᖁᓪᓗᒍ, ᐱᖁᔭᒃᓴᐃᑦ ᐊᖅᑯᓵᖃᑦᑕᕆᐊᖃᕐᒪᑕ ᐅᓄᑲᓪᓚᒃᑐᓂᒃ ᕿᒥᕐᕈᓇᒃᑕᐅᕝᕕᐅᔪᑎᒍᑦ. ᒪᕐᕉᒃ ᐊᔾᔨᒌᖏᑦᑑᒃ ᐱᖁᔭᒃᓴᐃᑦ ᑲᒪᒋᔭᐅᕙᒃᑐᑦ: ᒐᕙᒪᒃᑯᑦ ᐱᖁᔭᒃᓴᖓᑦ ᐊᒻᒪ ᒪᓕᒐᓕᐅᖅᑎᐅᖃᑕᐅᔪᒧᑦ ᐱᖁᔭᒃᓴᓕᐊᖑᔪᑦ.  ᒐᕙᒪᒃᑯᓐᓄᑦ ᐱᖁᔭᒃᓴᓕᐊᖑᔪᑦ ᓴᖅᑭᑕᐅᖃᑦᑕᖅᐳᑦ ᒥᓂᔅᑕᒧᑦ. ᐱᖁᔭᒃᓴᐃᑦ ᓄᑖᓂᒃ ᐊᐅᓚᔾᔭᐃᒋᐊᕈᓐᓇᖅᑐᑦ, ᐅᕝᕙᓗ ᕿᓂᕐᓗᑎᒃ ᐋᖅᑭᒋᐊᕈᑎᒃᓴᖓᓐᓂᒃ ᐱᖁᔭᕆᔭᐅᓕᕇᖅᑐᑦ.  ᒐᕙᒪᒃᑯᑦ ᑭᓯᐊᓂ ᓴᖅᑭᑦᑎᔪᓐᓇᖅᑐᑦ ᑕᐃᔭᐅᔪᓂᒃ “ᑮᓇᐅᔭᖅᑐᕐᓂᐊᖅᑐᓂᒃ ᐱᖁᔭᒃᓴᓂᒃ” - ᑖᓐᓇ ᐱᖁᔭᒃᓴᖅ ᒐᕙᒪᒃᑯᑦ ᑮᓇᐅᔭᖏᓐᓂᒃ ᐊᑐᕐᓂᐊᖅᑎᓪᓗᒍ ᐱᓐᖑᖅᑎᑕᐅᓯᒪᓕᖅᐸᑦ.


ᓯᕗᓪᓕᖅᐹᒥ ᐅᖃᓕᒫᖅᑕᐅᓂᖓ


ᑕᕝᕙᓂ, ᐱᖁᔭᒃᓴᖅ ᓴᖅᑭᑕᐅᓪᓗᓂ ᓯᕗᓪᓕᖅᐹᒥ ᐅᖃᓕᒫᖅᑕᐅᓂᐊᕐᒪᑦ ᒪᓕᒐᓕᐅᕐᕕᖕᒥ.  ᑕᐃᔭᐅᔾᔪᓯᖓ ᐅᖃᓕᒫᖅᑕᐅᓪᓗᓂ, ᑭᓯᐊᓂ ᑲᑎᒪᔾᔪᑕᐅᖏᓪᖢᓂ ᐱᖁᔭᒃᓴᖅ.  ᑕᕝᕙᓂ, ᐱᖁᔭᒃᓴᖅ ᑕᖅᑲᒃᑯᓄᖓ ᑕᑯᔭᐅᔪᓐᓇᕐᓯᓪᓗᓂ, ᐊᒻᒪ ᑭᓇᑐᐃᓐᓇᖅ ᐊᔾᔨᖓᓂᒃ ᐱᔪᒪᒍᓂ ᑐᒃᓯᕋᕈᓐᓇᕐᓯᓪᓗᓂ.  ᑕᐃᒪᓕ ᒪᓕᒐᓕᐅᕐᕕᖕᒥ ᓂᕈᐊᕈᑕᐅᓚᐅᕐᓗᓂ ᐱᖁᔭᒃᓴᖅ, ᑐᒡᓕᖓᓂ ᐅᖃᓕᒫᖅᑕᐅᓕᖅᐸᒃᑐᖅ.


ᑐᒡᓕᐊᓂ ᐅᖃᓕᒫᖅᑕᐅᓂᖏᑦ


ᑕᕝᕙᓂ, ᒪᓕᒐᓕᐅᖅᑎᑦ ᑲᑎᒪᔨᖏᑦ ᐅᖃᐅᓯᖃᑦᑕᖅᐳᑦ ᐱᔾᔪᑎᐊᓂᒃ ᐱᖁᔭᒃᓴᐅᑉ.  ᑖᓐᓇ ᓴᖅᑭᑦᑎᓯᒪᔪᖅ ᐱᖁᔭᒃᓴᒥᒃ ᐅᖃᓪᓚᐅᓯᖃᕐᓗᓂ ᓇᓗᓇᐃᖅᑎᕐᓗᓂᐅᒃ ᖃᓄᐃᒻᒪᑦ ᐱᖁᔭᒃᓴᖅ ᓴᖅᑭᑕᐅᖕᒪᖔᑦ, ᐊᒻᒪ ᑭᓱᓂᒃ ᓴᖅᑭᑦᑎᓂᐊᕐᒪᖔᑦ.  ᒪᓕᒐᓕᐅᖅᑎᑦ ᑲᑎᒪᔨᖏᑦ ᓂᓪᓕᖁᑎᖃᕈᒪᔪᑦ ᐱᖁᔭᒃᓴᐅᑉ ᒥᒃᓵᓄᑦ ᑕᕝᕙᓂ ᓂᓪᓕᐊᕕᖃᖅᐳᑦ.  ᑕᐃᒪᓕ ᑲᑎᒪᐅᑕᐅᔭᕇᖅᑎᓪᓗᒍ, ᒪᓕᒐᓕᐅᖅᑎᑦ ᑲᑎᒪᔨᖏᑦ ᓂᕈᐊᒃᑲᓐᓂᓕᖃᑦᑕᖅᐳᑦ.  ᑕᐃᒪᓕ ᐱᖁᔭᒃᓴᖅ ᑐᒡᓕᐊᓂ ᐅᖃᓕᒫᖅᑕᐅᒃᐸᑦ, ᑐᔭᐅᕙᒃᑐᑦ ᑲᑎᒪᔨᕋᓛᓄᑦ ᕿᒥᕐᕈᓇᒃᑕᐅᓂᐊᕐᒪᑦ.


ᑲᑎᒪᔨᕋᓛᑦ


ᑕᕝᕙᓂ, ᐱᖁᔭᒃᓴᖅ ᕿᒥᕐᕈᓇᒃᑕᐅᓪᓚᕆᖃᑦᑕᖅᐳᖅ, ᓈᓴᐅᑎᖏᑎᒍᑦ ᕿᒥᕐᕈᓇᒃᑕᐅᓪᓗᑎᒃ ᒪᓕᒐᓕᐅᖅᑎᑦ ᑲᑎᒪᔨᕋᓛᖁᑎᖏᓐᓄᑦ.  ᑖᓐᓇ ᓴᖅᑭᑦᑎᔪᖅ ᐱᖁᔭᒃᓴᒥᒃ ᑲᑎᒪᔨᕋᓛᑦ ᓵᖓᓄᐊᖅᐸᒃᐳᖅ ᐊᐱᖅᑯᑎᓂᒃ ᑭᐅᔭᖅᑐᕐᖢᓂ ᐱᓪᓗᒍ ᐱᖁᔭᒃᓴᖅ.  ᑲᑎᒪᔨᕋᓛᑦ ᖃᐃᖅᑯᔨᔪᒪᒍᑎᒃ ᖃᐃᖅᑯᔨᕙᖕᒥᔪᑦ ᑎᒥᐅᔪᓂᓐᖔᖅᑐᓂᑦ ᐊᒻᒪ ᑭᓇᒃᑯᑐᐃᓐᓴᕐᓂᑦ ᑐᓴᕋᓱᐊᖃᑦᑕᖅᑐᑦ ᖃᓄᖅ ᐃᓱᒪᒋᔭᐅᖕᒪᖔᑦ ᐱᖁᔭᒃᓴᖅ ᑲᑎᒪᔨᕋᓛᓄᑦ ᐅᖃᓪᓚᒋᐊᖅᑐᖅᑎᑕᐅᓪᓗᑎᒃ. ᑲᑎᒪᔨᕋᓛᑦ ᐱᔪᒪᒍᑎᒃ ᐃᓄᓕᒫᖅᑎᑦᓯᓗᑎᒃ ᑲᑎᒪᑎᑦᓯᔪᓐᓇᕐᒥᔪᑦ ᐱᖁᔭᒃᓴᖅ ᐱᓪᓗᒍ ᓄᓇᓕᖕᓂ ᐃᖃᓗᐃᑦ ᓯᓚᑖᓂ.  ᑕᐃᒪᓕ ᒪᓕᒃᓗᒍ ᖃᓄᐃᑦᑑᓂᖓ ᐱᖁᔭᒃᓴᐅᑉ ᑲᑎᒪᔾᔪᑕᐅᔫᑉ, ᑲᑎᒪᔨᕋᓛᑦ ᑕᕝᕙᓂ ᐱᓕᕆᐊᖃᖅᑎᓪᓗᒋᑦ ᐊᑯᓂᐅᓂᖃᖅᐸᒃᐳᖅ ᐅᓪᓗᓄᑦ ᐅᓄᖏᑦᑐᓂᑦ ᑎᑭᓪᓗᒍ ᐱᓇᓱᐊᕈᓯᕐᓄᑦ ᐅᓄᑲᓪᓚᒃᑐᓄᑦ.  ᑲᑎᒪᔨᕋᓛᑦ ᓴᖅᑭᑦᑎᔪᓐᓇᖅᐳᑦ ᐋᖅᑭᒋᐊᖅᑕᐅᔾᔪᑎᒃᓴᖓᓐᓂᒃ ᐱᖁᔭᒃᓴᐅᑉ.  ᑭᖑᓪᓕᖅᐹᒥ ᐱᓕᕆᔭᐅᖃᑦᑕᖅᑐᖅ, ᑲᑎᒪᔨᕋᓛᑦ ᐱᖁᔭᒃᓴᒥᒃ ᐅᑎᖅᑎᑦᑎᓪᓗᑎᒃ ᐱᖁᔭᒃᓴᒥᒃ ᒪᓕᒐᓕᐅᕐᕕᐅᑉ ᐃᓗᐊᓄᑦ.


ᑲᑎᒪᑐᐃᓐᓇᕐᓂᖅ


ᑕᕝᕙᓂ, ᒪᓕᒐᓕᐅᖅᑎᑦ ᑲᑎᒪᔨᖏᑦ ᐅᖃᐅᑎᖃᕈᓐᓇᖅᐳᑦ ᐱᖁᔭᒃᓴᒥᒃ.  ᑲᑎᒪᑐᐃᓐᓇᖅᑎᓪᓗᒋᑦ, ᐅᖃᖅᑎᖓᑦ ᑲᑎᒪᑎᑦᓯᕙᖏᒻᒪᑦ.  ᑲᑎᒪᖃᑦᑕᖅᑐᑦ ᐱᕐᔪᐊᖏᓐᓂᖅᓴᐅᓪᓗᑎᒃ.  ᓴᖅᑭᑦᑎᓯᒪᔪᖅ ᐱᖁᔭᒃᓴᒥᒃ ᐊᐱᖅᓱᖅᑕᐅᕕᖕᒥ ᐃᒃᓯᕙᕙᒃᑐᖅ ᒪᓕᒐᓕᐅᕐᕕᖕᒥ ᑭᐅᖃᑦᑕᖢᓂᒋᑦ ᒪᓕᒐᓕᐅᖅᑎᓄᑦ ᐊᐱᖅᑯᑎᐅᔪᑦ ᐱᖁᔭᒃᓴᐅᑉ ᒥᒃᓵᓄᓕᖓᔪᑦ. 


ᐱᖓᔪᐊᓂ ᐅᖃᓕᒫᖅᑕᐅᓂᖏᑦ


ᑖᓐᓇ ᐊᑐᖅᑕᐅᓲᖅ ᑭᖑᓪᓕᖅᐹᖑᕗᖅ ᐱᖁᔭᒃᓴᖅ ᑲᒥᓴᓇᒧᑦ ᐊᖏᖅᑕᐅᓚᐅᓐᖏᓐᓂᖓᓂ ᐱᖁᔭᕐᔪᐊᓐᖑᓪᓚᕆᓚᐅᓐᖏᓐᓂᖓᓂᓗ.  ᑕᒪᓐᓇ ᐊᑐᖅᑕᐅᓲᖑᕗᖅ ᐱᖁᔭᒃᓴᖅ ᑭᖑᓪᓕᖅᐹᖅᓯᐅᓕᖅᑎᓪᓗᒍ ᕿᒥᕐᕈᔭᐅᔪᓐᓇᕐᓂᐊᕐᒪᑦ.


ᑲᒥᓴᓇᒧᑦ ᐱᓐᖑᖅᑎᑕᐅᓂᖏᑦ


ᑕᒪᓐᓇ ᐊᑐᓕᖅᑎᓪᓗᒍ, ᓄᓇᕗᑦ ᑲᒥᓴᓇᖓᑦ ᐊᖏᖅᐳᖅ ᐱᖁᔭᒃᓴᕐᒥᒃ.  ᐊᔾᔨᑐᐃᓐᓇᖓ ᓲᕐᓗ ᑯᐃᓐ ᑭᒡᒐᖅᑐᖅᑎᖓ ᑲᓇᑕᐅᑉ ᐊᕕᒃᑐᖅᓯᒪᓂᖓᓂ ᐊᖏᖅᓯᑎᓪᓗᒍ ᒪᓕᒐᓕᐅᕐᕕᖓᓐᓂ.


ᑐᑭᓯᑦᑎᐊᕆᐊᖃᖅᑐᒍᑦ ᒪᓕᒐᑦ ᐃᓛᓐᓂ ᐊᑐᓯᑲᐅᑎᒋᖃᑦᑕᓐᖏᓐᓂᖏᓐᓂ ᑲᒥᓴᓇᒧᑦ ᐊᖏᖅᑕᐅᓯᒪᓕᕋᓗᐊᖅᑎᓪᓗᒋᑦ.  ᐃᓛᓐᓂᒃᑯᑦ, ᒪᓕᒐᐅᑉ ᐃᓗᐊᒍᑦ ᓇᓗᓇᐃᖅᓯᓯᒪᓲᖅ ᖃᖓᐅᓕᖅᐸᑦ ᐅᓪᓗᖓ ᐊᑐᓕᖅᑎᑕᐅᓂᐊᕐᒪᖔᖓᓂ.  ᐃᓚᖏᓐᓂ ᐅᖃᖅᓯᒪᖃᑦᑕᖅᑐᖅ ᐅᓪᓗᖅ ᐊᑐᓯᒋᐊᕐᕕᖓ ᐃᓱᓕᐅᕈᑕᐅᓂᐊᕐᓂᖓᓂ ᒥᓂᔅᑕᐃᑦ ᑲᑎᒪᔨᖏᓐᓄᑦ.


ᐃᓄᒃᑎᑐᑦ ᐃᓄᐃᓐᓇᖅᑐᓪᓗ ᐱᖁᔭᒃᓴᑦ ᐊᑐᓂ ᑎᑎᕋᖅᑕᐅᖃᑦᑕᕋᓗᐊᖅᑎᓪᓗᒋᑦ, ᓴᓐᖏᓂᖃᖅᑎᑕᐅᔪᑐᐊᒃ ᖃᓪᓗᓈᑎᑐᑦ ᐊᒻᒪᓗ ᐅᐃᕖᖅᑎᑐᑦ ᑎᑎᕋᖅᓯᒪᔪᑦ.  ᒐᕙᒪᒃᑯᑦ ᐱᕙᓪᓕᐊᔪᓕᐊᕆᖃᑦᑕᖅᑕᖏᑦ ᐊᒻᒪᓗ ᑲᑎᖅᓱᖅᑕᐅᓯᒪᔪᑦ ᐱᖁᔭᕐᔪᐊᑦ ᒪᓕᒐᓪᓗ ᓄᓇᕗᒻᒨᖓᔪᑦ ᒪᓕᒐᓕᕆᔨᒃᑯᑦ ᒪᓕᒐᓕᕆᔨᖏᑦᑎᒍᑦ ᖃᕆᓴᐅᔭᒃᑰᖅᑎᓯᒪᔭᖏᑦᑎᒍᑦ ᑕᑯᒋᐊᖅᑕᐅᔪᓐᓇᖅᑐᑦ.