ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᒃ
ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᒃ ᐱᖁᔭᕐᔪᐊᖓᑦ ᒪᓕᒐᓕᐅᖅᑎᓄᑦ ᐊᓂᒍᖅᑎᑕᐅᓚᐅᖅᓯᒪᔪᖅ ᑎᓯᐱᕆ 2009-ᖑᑎᓪᓗᒍ ᐊᒻᒪᓗ ᐊᑐᓕᖅᑎᑕᐅᓚᐅᖅᓯᒪᓪᓗᓂ ᔭᓄᐊᕆ 1, 2010-ᒥ. ᐃᓕᓴᖅᓯᔾᔪᑏᑦ ᓴᖅᑭᑕᐅᓚᐅᖅᐳᑦ ᐃᓄᐃᑦ ᐱᖅᑯᓯᒃᑯᑦ, ᐃᓅᓯᒃᑯᑦ ᐅᕝᕙᓘᓐᓂᑦ ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᑲᔪᖅᓯᒪᓪᓚᕆᖕᓂᖏᓐᓄᑦ ᐃᓕᓴᕆᔭᐅᔾᔪᑎᑖᕈᓐᓇᕐᓂᐊᕐᒪᑕ.
ᐃᓕᓴᖅᓯᔾᔪᑎ ᖁᑦᑎᖕᓂᖅᐹᖑᕗᖅ ᓄᓇᕗᒻᒥ, ᐊᒻᒪᓗ ᑖᓐᓇᐅᓕᖅᑎᓪᓗᒍ ᐊᓯᓕᒫᖏᑦ ᐃᓕᓴᖅᓯᔾᔪᑏᑦ, ᓇᓗᓇᐃᖅᓯᔾᔪᑏᑦ ᐅᕝᕙᓘᓐᓃᑦ ᐅᔭᒦᑦ ᓄᓇᕗᑦ ᒐᕙᒪᒃᑯᓐᓄᑦ ᓴᖅᑭᑕᐅᕙᓚᐅᖅᑐᑦ ᐊᑦᑎᖕᓂᖅᓴᐅᓕᖅᑎᑕᐅᓯᒪᓪᓗᑎᒃ. ᐃᓕᓴᖅᓯᔾᔪᑎᓕᕆᓂᕐᒧᑦ ᖃᐅᔨᒪᔨᑕᕆᔭᐅᔪᑦ ᑲᑎᒪᔩᑦ ᐊᑐᓕᖁᔭᓕᐅᖃᑦᑕᖅᐳᑦ ᑭᒃᑯᑦ ᐃᓕᓴᕆᔭᐅᔾᔪᑎᑖᕐᓂᐊᕐᒪᖔᖏᑦ. ᖃᐅᔨᒪᔨᑕᕆᔭᐅᔪᑦ ᑲᑎᒪᔨᖏᓐᓄᑦ ᐃᒃᓯᕚᖃᑕᐅᕗᑦ ᓄᓇᕗᑦ ᒪᓕᒐᓕᐅᕐᕕᐊᑕ ᐅᖃᖅᑎᖓ, ᓄᓇᕗᒻᒥ ᐃᖅᑲᖅᑐᐃᕕᓕᕆᔨᒃᑯᑦ ᐃᖅᑲᖅᑐᐃᔨᑦ ᐊᖓᔪᖅᑳᖓᑦ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑦ.
ᐊᕐᕌᒍᑕᒫᖅ ᐅᓄᓛᑦ ᐃᓕᓴᕆᔭᐅᔾᔪᒻᒥᒃ ᐅᔭᒥᒃᑕᐅᔪᑦ ᐱᖓᓲᔪᓐᓇᖅᑐᑦ. ᑲᓇᑕᒥᐅᑕᖅ ᐃᓕᓴᕆᔭᐅᔾᔪᒻᒥᒃ ᐅᔭᒥᒃᑕᐅᖃᑕᐅᔪᓐᓇᖅᐳᖅ, ᐊᒻᒪᓗ ᐅᔭᒥᒃᑕᐅᑎᓪᓗᒍ, ᓄᓇᕗᒻᒥᐅᑕᐅᔭᕆᐊᓕᒃ ᐅᕝᕙᓘᓐᓃᑦ ᓄᓇᕗᒻᒥᐅᑕᑐᖃᐅᓗᓂ, ᐅᕝᕙᓘᓐᓃᑦ ᒫᓐᓇ ᓄᓇᕘᓕᖅᑐᒥ ᓄᓇᖃᑯᑖᖕᓂᑰᓗᓂ ᓄᓇᕗᓐᖑᖅᑎᑕᐅᓚᐅᖅᑎᓐᓇᒍ ᐊᐃᕐᕆᓕ 1, 1999-ᒥ.
ᓂᕈᐊᒐᒃᓴᓐᖑᖅᑎᑕᐅᓯᒪᔪᑦ 2012-ᒥ ᑐᓂᔭᐅᓯᒪᔭᕆᐊᖃᕐᓂᐊᖅᑐᑦ ᒪᐃ 18, 2012-ᖑᓚᐅᖏᓐᓂᖓᓂ. ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐃᓕᓴᖅᓯᓂᖃᓛᕐᒪᑕ ᐊᕐᕌᒍᒋᔭᑦᑎᓐᓂ ᑕᒪᑐᒪᓂ.
| Attachment | Size |
|---|---|
| 2012 −ᒥ ᓂᕈᐊᒐᒃᓴᖃᖅᑎᑎᓂᖅ ᒪᑐᐃᖅᑕᐅᓂᖓ ᓄᓇᕗᒥ ᐱᓕᕆᑦᓯᐊᖅᓯᒪᔪᓄᑦ ᐃᓕᑕᖅᓯᔾᔪᑎ | 200.81 KB |