ᒥᓂᔅᑕ ᐸᑎᑯᓗᒃ ᐊᕐᓇᑲᖅ

ᐅᐱᓐᓇᖅᑐᖅ: 
ᐃᖃᓗᐃᑦ−ᓂᐊᖁᙴ

ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ

ᒥᓂᔅᑕ ᐃᓅᓯᕐᒥᑦ ᑭᐱᓯᑦᑕᐃᓕᑎᑦᑎᓂᕐᒧᑦ

ᒥᓂᔅᑕ ᐃᓐᓇᕐᓄᑦ ᑭᒡᒐᖅᑐᖅᑎᓄᑦ

Legislative Office: 

ᐅᖄᓚᐅᑖ: (867) 975-5070
ᓱᒃᑲᔪᒃᑰᕈᑖ: (867) 975-5073
ᖃᕆᓴᐅᔭᒃᑯᑦ ᑐᕌᕈᑖ: pangnakak [at] gov [dot] nu [dot] ca

ᓂᕈᐊᖅᑕᐅᕕᐊᓂ ᑎᑎᕋᕐᕕᐊ: 

P.O. Box 1150
Iqaluit, NU
X0A 0H0
ᐅᖄᓚᐅᑖ: (867) 979-0410
ᓱᒃᑲᔪᒃᑰᕈᑖ: (867) 979-0415
ᖃᕆᓴᐅᔭᒃᑯᑦ ᑐᕌᕈᑖ: patangnakak [at] niaqunnguumla [dot] ca

ᐹᑦ ᐊᕐᓇᒃᑲᒃ ᓂᕈᐊᖅᑕᐅᒃᑲᓐᓂᓚᐅᖅᑐᖅ ᓂᕈᐊᕕᔾᔪᐊᕐᓇᐅᑎᓪᓗᒍ ᐅᑐᐱᕆ 30, 2017-ᒥ, ᑭᒡᒐᖅᑐᐃᓪᓗᓂ ᐃᖃᓗᐃᑦ-ᓂᐊᖁᖖᒎ ᓂᕈᐊᖅᑕᐅᓯᒪᕝᕕᖓᓂ ᑕᕝᕙᓂ ᑕᓪᓕᒪᖓᓐᓂ ᓂᕈᐊᖅᑕᐅᓯᒪᔪᓂ ᒪᓕᒐᓕᐅᕐᕕᖕᒥ.

ᒥᔅ ᐊᕐᓇᒃᑲᖅ ᒥᓂᔅᑕᐃᑦ ᑲᑎᒪᔨᖏᓐᓄᑦ ᓂᕈᐊᖅᑕᐅᓚᐅᖅᑐᖅ ᓄᕕᐱᕆ 17, 2017−ᒥ, ᓄᓇᕗᒻᒥ ᓯᕗᒃᑲᖅᑕᖅᑏᑦ ᓂᕈᐊᖅᑕᐅᓕᖅᑎᓪᓗᒋᑦ. ᒥᓂᔅᑕ ᐊᕐᓇᒃᑲᖅ ᑎᑎᕋᕐᕕᐊᓄᑦ ᐊᖏᖅᑎᑕᐅᓚᐅᖅᑐᖅ ᓄᕕᐱᕆ 21, 2017−ᒥ. ᒥᓂᔅᑕᕆᔭᐅᔪᖅ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᓐᓄᑦ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᓪᓗᓂ.

ᒥᔅ ᐊᕐᓇᒃᑲᒃ ᐃᒃᓯᕚᖃᑕᐅᓚᐅᖅᑐᖅ ᑎᓴᒪᖏᓐᓂ ᒪᓕᒐᓕᐅᖅᑎᓂ. ᒥᔅ ᐊᕐᓇᒃᑲᒃ ᐃᒃᓯᕙᐅᑕᕆᔭᐅᓚᐅᖅᑐᖅ ᒐᕙᒪᒃᑯᑦ ᑮᓇᐅᔭᖏᓐᓄᑦ, ᐃᒻᒥᒃᑰᔪᑦ ᐃᖅᑲᓇᐃᔭᖅᑎᖏᓐᓄᑦ ᐊᓯᖏᓐᓄᓪᓗ ᑎᒥᐅᔪᓄᑦ ᐃᓚᒋᔭᐅᓪᓗᓂᓗ ᑲᑎᒪᔨᓕᕆᔩᑦ ᑲᑎᒪᔨᖏᓐᓄᑦ.

ᒥᔅ ᐊᕐᓇᒃᑲᒃ ᐱᕈᖅᓴᓚᐅᖅᑐᖅ ᓄᓇᕗᒻᒥ, ᑭᖖᒐᕐᓂ ᐸᖕᓂᖅᑑᒥᓗ. ᒥᔅ ᐊᕐᓇᒃᑲᒃ ᐃᖃᓗᖕᒥᐅᑕᐅᓕᖅᑐᖅ ᐅᑭᐅᓂᒃ 30-ᑲᓴᖕᓂᒃ. ᒥᔅ ᐊᕐᓇᒃᑲᒃ ᓄᓇᕗᑦ ᓯᒪᑦᑐᖅᓴᕐᕕᖕᒥ ᐱᔭᕇᖅᓯᓯᒪᔪᖅ ᐅᖃᕈᓐᓇᖅᑐᓂᓗ ᑕᒪᕐᒥᒃ ᖃᓪᓗᓈᑐᑦ ᐃᓄᒃᑐᓪᓗ.

ᒥᔅ ᐊᕐᓇᒃᑲᒃ, ᓯᕗᓪᓕᖅᐸᐅᓪᓗᓂ ᓄᓇᕗᒻᒥ ᑲᒥᓯᓇᐅᑉ ᑐᖓᓕᕆᓚᐅᖅᑕᖓ, ᐳᖅᑐᔫᑕᐅᓂᖅᓴᓂᒃ ᐃᖅᑲᓇᐃᔮᖃᖃᑦᑕᖅᓯᒪᔪᖅ ᐃᖅᑲᓇᐃᔭᖃᑦᑕᓕᕐᓂᕐᒥᓂ. ᒥᔅ ᐊᕐᓇᒃᑲᒃ ᐱᓕᕆᖃᑦᑕᖅᓯᒪᔪᖅ ᐊᐅᓚᑦᑎᔨᒻᒪᕆᐅᓪᓗᓂ ᑲᑭᕙᒃ ᑲᑐᔾᔨᖃᑎᒌᖏᓐᓂᒃ, ᐊᐅᓚᑦᑎᔨᐅᓪᓗᓂ ᑮᓇᐅᔭᓕᕆᓂᕐᒧᑦ ᓯᕗᓪᓕᐅᔾᔭᐅᓯᒪᔪᓄᑦ ᓄᓇᕗᑦ ᒐᕙᒪᖏᑦᑕ ᒐᕙᒪᐅᖃᑎᒌᒃᑐᓕᕆᔨᒃᑯᖏᓐᓄᑦ, ᐊᐅᓚᑦᑎᔨᐅᓪᓗᓂ ᒐᕙᒪᐅᖃᑎᒌᒃᑐᓕᕆᔨᒃᑯᖏᓐᓄᑦ ᑲᓇᑕᐅᑉ ᒐᕙᒃᑯᖏᑦᑕ ᐱᓕᕆᕝᕕᖓᓐᓄᑦ, ᐃᑲᔪᖅᑎᐅᓪᓗᓂᓗ ᖃᔅᓯᑲᓪᓚᖕᓄᑦ ᒥᓂᔅᑕᓄᑦ.

ᒥᔅ ᐊᕐᓇᒃᑲᒃ ᐃᓚᒋᔭᐅᖃᑦᑕᖅᓯᒪᔪᖅ ᖃᔅᓯᑲᓪᓚᖕᓄᑦ ᑲᑎᒪᔨᓄᑦ ᑎᒥᖁᑎᒋᔭᐅᔪᓄᓪᓗ, ᐱᖃᓯᐅᑎᓪᓗᒋᑦ ᓄᓇᕗᒻᒥ ᓄᓇᐅᑉ ᖄᖓᓂ ᐱᔪᓐᓇᐅᑎᓄᑦ ᑲᑎᒪᔨᖏᓐᓄᑦ ᐊᒻᒪᓗ ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ.

ᒥᔅ ᐊᕐᓇᒃᑲᒃ ᐊᑭᓕᖅᓱᖅᑕᐅᓇᓂ ᓄᓇᓕᖕᓂ ᐱᓕᕆᖃᑕᐅᓯᒪᔪᒻᒪᕆᒃ ᐅᑯᓄᖓ ᐃᖃᓗᖕᓂ ᑐᓂᖅ ᑕᐃᒻ ᑲᑎᒪᔨᕋᓛᖏᓐᓄᑦ, ᐋᖕᓕᑲᒃᑯᑦ ᑐᒃᓯᐅᕐᕕᖓᓐᓄᑦ, ᐊᒻᒪᓗ ᐅᓪᓗᒥᐅᔪᖅ ᓴᐃᓕᕕᒃ ᑎᒥᖓᓐᓄᑦ ᑲᑎᒪᔨᐅᖃᑕᐅᓪᓗᓂ.

ᐹᑦ ᐊᒻᒪ ᐋᑦᑎ ᐊᕐᓇᒃᑲᒃᑯᒃ ᐱᖓᓱᓂᒃ ᕿᑐᕐᖓᓖᒃ ᐃᓐᓇᕈᖅᓯᒪᓕᖅᑐᓂᒃ: ᓴᐅᕋᓐ, ᒫᑎᐅ ᐊᒻᒪ ᒪᐃᑯ, ᐊᒻᒪ ᑎᓴᒪᓂᒃ ᐃᕐᖑᑕᖃᕐᖢᑎᒃ: ᒪᕇᐊ, ᐊᕙ, ᐊᐃᓴᐃᐊ ᐊᒻᒪ ᓕᐊᒻ. ᒥᔅ ᐊᕐᓇᒃᑲᒃ ᓇᖕᒥᓂᖅ ᐱᐅᒋᔭᖃᖅᑐᖅ ᒥᖅᓱᕐᓂᕐᒥᒃ, ᓂᖅᑎᐅᕐᓂᕐᒥᒃ ᐊᒻᒪ ᓄᓇᒥ ᐊᐅᓪᓚᖅᓯᒪᓂᕐᒥᒃ.