 |
|
|
ᐅᐸᒍᓐᓇᖅᑕᑎᑦ | ᐊᖏᕋᖅ | Inuinnaqtun| English | Français |
|
 |
ᐹᓪ ᐅᑲᓕᖅ ᒪᓕᒐᓕᐅᖅᑎ ᐃᖃᓗᐃᑦ ᐱᖓᖕᓴᖓᓄᑦ |
| ᒪᓕᒐᓕᐅᖅᑎᑦ |
 ᐹᓪ ᐅᑲᓕᖅ ᑭᒡᒐᖅᑐᐃᓯᒪᔪᖅ ᐃᖃᓗᐃᑦ ᐱᖓᖕᓇᖓᓂᒃ ᑕᐃᒪᓐᖓᑦ 1999-ᒥ. ᓄᓇᕗᒻᒥ ᒪᓕᒐᓕᐅᖅᑎᓄᑦ ᓯᕗᓪᓕᕐᓄᑦ ᓂᕈᐊᖅᑕᐅᓚᐅᖅᓯᒪᔪᖅ ᕕᕗᐊᕆ 1999-ᒥ ᓂᕈᐊᕐᓂᕐᔪᐊᖅᑕᖃᖅᑎᓪᓗᒍ. ᑭᖑᕐᖓᓂ ᓂᕈᐊᖅᑕᐅᒃᑲᓐᓂᓚᐅᖅᓯᒪᔪᖅ ᕕᕗᐊᕆ 2004-ᒥ ᐊᒻᒪᓗ ᐊᒃᑑᐸ 2008-ᒥ. ᒥᔅᑐ ᐅᑲᓕᖅ ᓄᓇᕗᒻᒥ ᓯᕗᓕᖅᑎᐅᓚᐅᖅᑐᖅ ᐊᐃᕐᕆᓕ 1, 1999-ᒥᑦ ᓄᕕᐱᕆ 19, 2008-ᒧᑦ ᑎᑭᖢᒍ. ᑕᒪᓐᓇ ᐊᑐᖅᑎᓪᓗᒍ, ᒥᔅᑐ ᐅᑲᓕᖅ ᒥᓂᔅᑕᐅᕝᕕᖃᓚᐅᖅᑐᖅ ᒪᓕᒐᓕᕆᔨᒃᑯᓐᓄᑦ. ᒫᓐᓇ ᐃᓚᒋᔭᐅᖃᑕᐅᔪᖅ ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᖏᑦᑕ ᑲᑎᒪᔨᖏᓐᓄᑦ. 1980 ᐊᑐᖅᑎᓪᓗᒋᑦ, ᒥᔅᑐ ᐅᑲᓕᖅ ᐋᔩᖅᑎᓄᑦ ᑐᖏᓕᕆᔭᐅᓚᐅᖅᓯᒪᔪᖅ ᐃᑲᔪᖅᑎᒋᔭᐅᓪᓗᓂᓗ ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᓐᓄᑦ, ᑖᒃᑯᐊ ᑎᒥᐅᔪᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐋᔩᖅᑎᒋᔭᐅᓚᐅᖅᓯᒪᖕᒪᑕ. ᒥᔅᑐ ᐅᑲᓕᖅ ᐋᖅᑭᒃᓱᐃᓚᐅᖅᓯᒪᔪᖅ ᐃᓄᐃᑦ ᐃᑦᑕᕐᓂᓴᓕᕆᓂᕐᒧᑦ ᐸᐸᑦᑎᔨᖏᓐᓂᒃ, ᓄᓇᕗᒻᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ, ᓄᓇᕗᒻᒥ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐃᓕᓐᓂᐊᖅᑐᓕᕆᔨᖏᑦᑕ ᑲᑎᒪᔨᕋᓛᖏᓐᓂᒃ ᐊᒻᒪᓗ ᓄᓇᕗᒻᒥ ᐃᓅᓯᓕᕆᓂᕐᒧᑦ ᑲᑎᒪᔨᓂᒃ. 1990 ᐱᒋᐊᓕᓵᖅᑎᓪᓗᒋᑦ ᐃᓕᓐᓂᐊᕆᐊᒃᑲᓐᓂᓕᓚᐅᖅᓯᒪᔪᖅ, ᑳᓪᑕᓐ ᓯᓚᑦᑐᖅᓴᕐᕕᒡᔪᐊᖓᓐᓂᓗ ᐱᔭᕇᖅᓯᓚᐅᖅᓯᒪᓪᓗᓂ ᒐᕙᒪᓕᕆᓂᕐᒥᒃ ᑲᓇᑕᒥᓗ ᐃᓕᓐᓂᐊᖅᑕᐅᖃᑦᑕᖅᑐᓂᒃ. ᒥᔅᑐ ᐅᑲᓕᖅ ᐋᑐᕚ ᓯᓚᑦᑐᖅᓴᕐᕕᒡᔪᐊᖓᓐᓂ ᐱᔭᕇᖅᓯᓚᐅᖅᓯᒪᔪᖅ ᒪᓕᒐᓕᕆᔨᐅᓂᕐᒥᒃ 1997-ᒥ ᐊᒻᒪᓗ ᓄᓇᕗᒻᒥ ᒪᓕᒐᕐᓂᐊᖅᑏᑦ ᑲᑐᔾᔨᖃᑎᒌᖏᓐᓄᑦ ᐃᓚᓕᐅᑎᓚᐅᖅᓯᒪᓪᓗᓂ ᕕᕗᐊᕆ 12, 1999-ᒥ. ᒥᔅᑐ ᐅᑲᓕᖅ ᒪᕐᕉᖕᓂᒃ ᕿᑐᕐᖓᓕᒃ, ᓵᔅᑕ ᐊᒻᒪᓗ ᔪᐊᑕᓐ. ᒥᔅᑐ ᐅᑲᓕᖅ ᖁᕕᐊᒋᔭᓕᒃ ᐊᖑᓇᓱᖕᓂᕐᒥᒃ, ᐃᖃᓪᓕᐊᖃᑦᑕᕐᓂᕐᒥᒃ ᐊᒻᒪᓗ ᒑᕝᓂᕐᒥᒃ,. ᐅᖃᕈᓐᓇᑦᑎᐊᖅᑐᖅ ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᐅᐃᕖᑦ ᐅᖃᐅᓯᖏᓐᓂᒃ ᐃᓕᓐᓂᐊᖅᖢᓂ. |
ᓄᓇᕗᑦ ᒪᓕᒐᓕᐅᕐᕕᖓ |
|