 |
|
|
ᐅᐸᒍᓐᓇᖅᑕᑎᑦ | ᐊᖏᕋᖅ | Inuinnaqtun| English | Français |
|
 |
|
| ᒪᓕᒐᓕᐅᖅᑎᑦ |
ᒪᓕᒐᓕᐅᖅᑎ ᓗᐃ ᑕᐹᕐᔪᒃ ᓂᕈᐊᖅᑕᐅᒃᑲᓐᓂᓚᐅᖅᐳᖅ ᐱᖓᔪᒋᓕᖅᑕᖓᓄᑦ ᓄᓇᕗᒻᒥ ᒪᓕᒐᓕᕆᕝᕕᖕᒧᑦ ᐊᒃᑑᐸ 27, 2008-ᒥ ᒪᓕᒐᓕᐅᖅᑎᓂᓪᓗ ᓂᕈᐊᖅᑕᐅᒃᑲᓐᓂᖅᑐᑐᐊᖑᓚᐅᖅᖢᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᓂ ᒥᓂᔅᑕᐅᖃᑎᒌᓄᑦ. ᔮᓄᐊᕆ 29, 2009-ᒥ, ᓗᐃ ᑎᒃᑯᐊᖅᑕᐅᒃᑲᓐᓂᓚᐅᖅᐳᖅ ᒥᓂᔅᑕᐅᓂᕐᒧᑦ ᐃᓕᖅᑯᓯᓕᕆᔨᒃᑯᓐᓄᑦ ᒥᓂᔅᑕᙳᖅᑎᑕᐅᓪᓗᓂᓗ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᐅᖃᐅᓯᓕᕆᓂᕐᒧᑦ ᓄᓇᖃᖅᑳᖅᓯᒪᔪᓄᓪᓗ ᐊᒻᒪᓗᑦᑕᐅᖅ ᒐᕙᒪᒃᑯᑦ ᒪᓕᒐᓕᐅᕐᕕᖕᒥ ᓯᕗᒃᑲᖅᑕᖅᑎᐅᓂᐅᑉ ᐃᓂᖓᓄᑦ ᐃᓕᔭᐅᓪᓗᓂ. ᓗᐃ ᓯᕗᓪᓕᖅᐹᒥ ᓂᕈᐊᖅᑕᐅᓚᐅᖅᐳᖅ ᑐᒡᓕᐊᓄᑦ ᓄᓇᕗᒻᒥ ᒪᓕᒐᓕᕆᕝᕕᖕᒥ ᕕᕝᕗᐊᕆ 16, 2004-ᖑᑎᓪᓗᒍ. ᓯᕗᓪᓕᖅᐹᖓᓂ ᒥᓂᔅᑕᐅᑎᓪᓗᒍ ᐱᓕᕆᐊᒃᓴᖃᓚᐅᖅᐳᖅ ᐃᓕᖅᑯᓯᓕᕆᔨᒃᑯᓐᓂ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᑮᓇᐅᔭᓕᕆᔨᒃᑯᓐᓂᓗ. ᓗᐃ ᔮᓄᐊᕆ 30, 1953-ᒥ ᐃᓅᓚᐅᖅᓯᒪᕗᖅ ᐃᒡᓗᕕᒐᕐᒥ ᐊᒡᒎᑉ ᓯᑯᖓᓂ ᐃᒡᓗᓕᐅᑉ ᐅᐊᖕᓇᖓᓂ. ᓄᑕᕋᑯᓘᑎᓪᓗᒍ, ᖃᑕᙳᑎᖏᑦ ᐃᒡᓗᓕᖕᒧ ᓅᓚᐅᖅᓯᒪᔪᑦ, ᐊᖏᕐᕋᕇᓐᓇᓕᖅᖢᓂᐅᒡᓗ. 1959-ᒥ, ᓗᐃ ᐃᒡᓗᓕᒑᕐᔪᖕᒧᑦ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᕗᖅ, ᐊᔪᕐᓇᙱᓐᓂᖅᓴᓂᒃ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᓪᓗᓂ. ᓗᐃ ᐃᓄᖕᓂᒃ ᐱᔨᑦᑎᕋᖅᐸᓪᓕᐊᓕᓚᐅᖅᐳᖅ ᐃᒡᓗᓕᖕᒥᐅᑦ ᑯᐊᐸᒃᑯᖏᓐᓂ 12-ᓂᒃ ᐊᕐᕌᒍᖃᖅᑎᓪᓗᒍ ᓴᖅᑭᑎᕆᔨᐅᓪᓗᓂ, ᑭᖑᓂᖓᒍᓪᓗ ᑯᐊᐸᒃᑯᓐᓄᑦ ᐊᐅᓚᑦᑎᔨᒋᔭᐅᓕᓚᐅᖅᖢᓂ. ᐃᒡᓗᓕᖕᒥᐅᑦ ᑯᐊᐸᒃᑯᖏᑕ ᑲᑎᒪᔨᖏᓐᓄᑦ ᓂᕈᐊᖅᑕᐅᓚᐅᖅᐳᖅ ᑭᖑᓂᖓᒍᓪᓗ ᐅᑭᐅᖅᑕᖅᑐᒥᐅᑦ ᑯᐊᐸᖏᓐᓄᑦ ᐊᖓᔪᖅᑳᙳᖅᑎᑕᐅᓪᓗᓂ. ᓗᐃ ᐃᒡᓗᓕᖕᒥ ᒪᐃᔭᒋᔭᐅᓚᐅᖅᓯᒪᖕᒥᔪᖅ ᑲᑎᒪᔨᐅᓚᐅᖅᓯᒪᒋᓪᓗᓂᓗ. ᓗᐃ ᐱᓕᕆᐊᖃᖃᑕᐅᒻᒪᕆᓚᐅᖅᐳᖅ ᓄᓇᕗᒻᒥ ᓄᓇᑖᕋᓱᖕᓂᕐᒧᑦ ᐋᔩᖃᑎᒌᒃᑎᐅᖃᑕᐅᓪᓗᓂ ᑲᑎᒪᔨᐅᓪᓗᓂᓗ ᑐᙵᕕᒃ ᑲᑐᔾᔨᖃᑎᒌᓄᑦ ᓄᓇᕗᒻᒥ (ᒫᓐᓇ ᑕᐃᔭᐅᓕᖅᑐᑦ ᓄᓇᕗᑦ ᑐᙵᕕᒃᑯᑦ), ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᓄᑦ ᐊᖓᔪᖅᑳᕆᔭᐅᓪᓗᓂ (ᒫᓐᓇ ᑕᐃᔭᐅᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ). ᓗᐃ ᐅᖃᐅᓯᖃᕈᓐᓇᑦᑎᐊᖃᑦᑕᓚᐅᖅᐳᖅ ᐃᓄᐃᑦ ᐃᓕᖅᑯᓯᖓᓂᒃ ᐅᖃᐅᓯᖓᓂᓪᓗ ᐱᓕᕆᖃᑎᒋᕙᒃᑕᖏᓐᓄᓪᓗ ᓇᓗᓇᐃᖅᑕᐅᓯᒪᓪᓗᓂ ᐅᖃᓪᓚᒃᑎᐅᓪᓗᐊᑕᖅᐸᖕᓂᖓᓄᑦ ᐃᓄᖕᓂᒃ ᐃᓅᖃᑎᒌᓪᓗ ᐱᒻᒪᕆᐅᒋᔭᖏᓐᓂᒃ ᓄᓇᕗᒻᒥ ᐱᔾᔪᑎᓕᖕᓂᒃ. ᓗᐃ ᒫᓐᓇ ᐃᒡᓗᓕᖕᒥᐅᑕᐅᔪᖅ ᓄᓕᐊᖓᓗ ᓘᓯ ᐱᖓᓱᓂᓪᓗ ᓄᑕᕋᖃᖅᖢᑎᒃ. ᒪᕐᕈᖕᓂᒃ ᐃᕐᓂᖃᕐᒥᔫᒃ ᐃᓐᓇᐅᓕᖅᑑᖕᓂᒃ ᐃᒡᓗᓕᖕᒥᐅᑕᐅᖕᒥᔫᒃ ᐃᕐᓂᖏᑦ ᖃᑕᙳᑎᖏᓪᓗ. |
ᓄᓇᕗᑦ ᒪᓕᒐᓕᐅᕐᕕᖓ |
|
