 |
|
|
ᐅᐸᒍᓐᓇᖅᑕᑎᑦ | ᐊᖏᕋᖅ | Inuinnaqtun| English | Français |
|
 |
ᕼᐊᓐᑐ ᑐᑐ ᒪᓕᒐᓕᐅᖅᑎ ᐃᖃᓗᐃᑦ ᑭᑎᐊᓄᑦ |
| ᒪᓕᒐᓕᐅᖅᑎᑦ |
 ᕼᐊᓐᑐ ᑐᑐ ᑭᒡᒐᖅᑐᐃᓯᒪᔪᖅ ᐃᖃᓗᐃᑦ ᕿᑎᐊᓂ ᑕᐃᒪᓐᖓᓂᑦ 1999-ᒥ. ᓄᓇᕗᒻᒥ ᒪᓕᒐᓕᐅᕐᕕᖏᓐᓄᑦ ᓯᕗᓪᓕᕐᓄᑦ ᓂᕈᐊᖅᑕᐅᓚᐅᖅᓯᒪᔪᖅ ᕕᕗᐊᕆ 1999-ᒥ. ᑭᖑᕐᖓᓂ ᓂᕈᐊᖅᑕᐅᒃᑲᓐᓂᓚᐅᖅᑐᖅ ᕕᕗᐊᕆ 2004-ᒥ ᐊᒻᒪᓗ ᐊᒃᑑᐸ 2008-ᒥ. ᒥᔅᑐ ᑐᑐ ᐃᓅᓚᐅᖅᓯᒪᔪᖅ ᑲᖏᖅᖠᓂᕐᒥ ᐊᒻᒪᓗ ᐊᑕᐅᓯᐅᓐᖏᑦᑐᓂ ᓄᓇᓕᖕᓂ ᓄᓇᖃᖃᑦᑕᖅᓯᒪᓪᓗᓂ ᑲᓇᑕᒥ. ᐃᖅᑲᓇᐃᔭᖃᑦᑕᖅᓯᒪᔪᖅ ᒐᕙᒪᒃᑯᓐᓂ ᐊᒻᒪᓗ ᓇᖕᒥᓂᕆᔭᐅᔪᓂ, ᐃᓚᓕᐅᖢᒍ ᐊᕐᕕᐊᑦ ᕼᐋᒻᓚᒃᑯᖏᓐᓄᑦ ᐱᓐᖑᐊᖅᑐᓕᕆᔨᐅᓪᓗᓂ, ᐱᕙᓪᓕᐊᔪᓕᕆᔨᒃᑯᑦ ᐳᓚᕋᖅᑐᓕᕆᔨᒃᑯᓪᓗ ᐱᓕᕆᕝᕕᖓᓐᓂ ᑎᑎᕋᖅᑎᐅᓯᒪᓪᓗᓂ, ᑮᓇᐅᔭᓕᕆᔨᐅᓯᒪᓪᓗᓂ ᑮᓇᐅᔭᓕᕆᔨᒃᑯᑦ ᐱᓕᕆᕝᕕᖓᓐᓄᑦ, ᐊᒻᒪᓗ ᐊᖓᔪᖅᑳᑉ ᑐᖏᓕᕆᓯᒪᓪᓗᓂᐅᒃ ᓄᓇᑦᓯᐊᕐᒥ ᐃᒡᓗᓕᕆᔨᕐᔪᐊᒃᑯᓐᓄᑦ. ᒥᔅᑐ ᑐᑐ ᓇᖕᒥᓂᖃᕐᒥᔪᖅ ᓇᓪᓕᐅᒃᑯᒫᖅᑖᕐᕕᖕᒥᒃ. ᒪᓕᒐᓕᐅᕐᕕᖕᒧᑦ ᓂᕈᐊᖅᑕᐅᓚᐅᓐᖏᓐᓂᕐᒥᓂ, ᒥᔅᑐ ᑐᑐ ᐊᑕᐅᓯᐅᓐᖏᑦᑐᓂᒃ ᐃᖅᑲᓇᐃᔮᖃᖃᑦᑕᖅᓯᒪᔪᖅ, ᐃᓚᓕᐅᖢᒍ ᐃᒃᓯᕙᐅᑕᕆᔭᐅᓪᓗᓂ ᐸᓪᓚᐃ ᐊᒻᒪᓗ ᑭᓴᕐᕕᐅᑉ ᑯᐊᐸᒃᑯᖏᓐᓄᑦ ᐊᕐᕕᐊᓂ ᐊᒻᒪᓗ ᑲᖏᖅᖠᓂᕐᒥ, ᑲᑎᒪᔨᐅᖃᑕᐅᓯᒪᓪᓗᓂ ᓄᓇᑦᓯᐊᕐᒥ ᑯᐊᐸᒃᑯᑦ ᐱᓯᓂᓯᓕᕆᔨᖏᓐᓄᑦ, ᑲᑎᒪᔨᐅᖃᑦᑕᖅᓯᒪᓪᓗᓂ ᐅᑭᐅᖅᑕᖅᑐᒥ ᐱᓐᖑᐊᖅᑐᓕᕆᔨᖏᓐᓄᑦ, ᑲᑎᒪᔨᐅᖃᑦᑕᖅᓯᒪᓪᓗᓂ ᐅᑭᐅᖅᑕᖅᑐᒥ ᑯᐊᐸᒃᑯᑦ ᑎᒥᖁᑎᖏᓐᓄᑦ ᐊᒻᒪᓗ ᑲᖏᖅᖠᓂᐅᑉ ᕼᐋᒻᓚᖏᓐᓄᑦ ᑲᑎᒪᔨᐅᖃᑦᑕᖅᓯᒪᓪᓗᓂ. ᑐᒡᓕᐊᓂ ᒪᓕᒐᓕᐅᖅᑏᑦ ᐃᒃᓯᕚᖅᑎᓪᓗᒋᑦ ᒥᔅᑐ ᑐᑐ ᐃᒃᓯᕙᐅᑕᕆᔭᐅᓚᐅᖅᑐᖅ ᒐᕙᒪᒃᑯᑦ ᐊᐅᓚᓂᖏᓐᓄᑦ ᓵᑕᒃᓴᐅᓂᖏᓐᓄᓪᓗ ᑲᑎᒪᔨᕋᓛᖏᓐᓄᑦ. ᐃᓚᒋᔭᐅᖃᑕᐅᓚᐅᕐᒥᔪᖅ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᓪᓗ ᑲᑎᒪᔨᕋᓛᖏᓐᓄᑦ, ᐃᓚᒋᔭᐅᖃᑕᐅᓪᓗᓂᓗ ᒪᓕᒐᓄᑦ, ᐱᕙᓪᓕᐊᔾᔪᓯᕐᓄᑦ ᐱᔪᓐᓇᐅᑎᓕᕆᓂᕐᒧᓪᓗ ᑲᑎᒪᔨᕋᓛᖏᓐᓄᑦ, ᑎᒃᑯᐊᖅᓯᔩᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᓐᓄᑦ. ᒥᔅᑐ ᑐᑐ ᑎᒃᑯᐊᖅᑕᐅᓚᐅᖅᑐᖅ ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕᐅᕝᕕᖓᓐᓄᑦ ᐊᒻᒪᓗ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᒥᓂᔅᑕᐅᕝᕕᖓᓄᑦ ᓄᕕᐱᕆ 19, 2008-ᖑᑎᓪᓗᒍ. ᒥᓂᔅᑕᐅᖕᒥᔪᖅ ᓄᓇᕗᒻᒥ ᓯᓚᑦᑐᖅᓴᕐᕕᒃᑯᓐᓄᑦ ᐊᒻᒪᓗ ᐊᖏᕐᕋᖃᓐᖏᑦᑐᓕᕆᓂᕐᒥᒃ ᑎᒍᒥᐊᕆᓪᓗᓂ. |
ᓄᓇᕗᑦ ᒪᓕᒐᓕᐅᕐᕕᖓ |
|