 |
|
|
Tuhaqviginagialgit | Pilihaarniq | ᐃᓄᒃᑎᑐᑦ | English | Français |
|
 |
Nanngauyuq Peter Taptuna Maligaliuqti Kugluktuk |
|
Uqaqatigiiqattarniit (Hansardkutigut) |
 Peter Taptuna niruaqtauhimayuq uvunga pingahuannut Maligaliurviat Nunavut uvani October 27, 2008-mi. Kivgaqtuihimayuq Kugluktuk-mi, uataaniitqiyauyuq Nunavunmi. Uvani November 19, 2008 Peter tikkuaqtauhimayuq Ministaulinganut Kiinauyatigut Pivallianikhauningannut ukunanilu Ingilrayuliriyitkut. Kivgaqtuihimayurlu Tugliriyaani Hivuliqti, Minista Kamagiyaqaqhuni Nunavut Pivallianikhakkut Kuaparisat, Minista Kamagiyaqaqhuni Nunavut Nanminiqaqtunut Kiinauyatigut Kuaparisat uvanilu Minista Kamagiyaqaqhuni Uyarakhiuqtinut.Peter inuuhimayuq Iqaluktuuttiarmi, talva kihimi nunaqakhaaqhimayuq Kugluktuk-mi. Ilihariaqhimayuq Inuvik, Nunattiarmi. Peter havakhimayuq taattiin (13) ukiuni uqhuryualiqinirmi kaasiliiliqinirmilu havaanginni, uvanivalluq taryuryuanganni Beaufort Taryuani, ilauqataubluni hivulliublunilu Inuinnaubluni ikuutaqtiuvakhimayuq. Umiktauhimalirmat uqhuryualiqinirlu kaasiliiliqinirlu uataani Ukiuqtaqtup, Peter havakhimayuq Lupin Gold Mine Uyarakhiurviani pingannaani-kivataani Kugluktuk, uvvalu ilihaqtaminik iniqhihimayuq makaaniuliqhuni, ayuiqhimaliqhuniuk havaakhamini ukunanilu Red Seal naunaipkutaqaliqhuni. Utiffaaqhuni Kugluktuk-mut, Peter ilihaqhimayuq Nunavut Ilihariaqpaalliviani, naunaipkutaqaliqhuni Aulapkainirmut Iliharninganni, ilagiingnikkullu kaantraaliqinikkullu maligainnik, nanminiqarnikkut aulapkainiannik, uvanilu havaakhaqhiuqtut aulapkainiannik. Uvanngat 1999 uvunga 2004, Peter kivgaqtuihimayuq hamalatkunni katimayiubluni uvvalu maiyap tugliriyaani havaaqaqhimayuq Hamalatkuanni Kugluktuk. Aulapkaiyiuhimablunilu ikhivautauhimayuugaluarlu ukunani Kitingmeot Atannguqtuvianni uvanngat 2000-mit 2008-mut, kivaqtuqtuihimablunilu aulapkainirmut uvani Nunavut Pivallianikkut Kuaparisani. Maligaliuqtiuhimatinnagu pingahuat Maligaliurvianni Nunavut, Peter havaaqaqhimayuq ukunani Kugluktuk Angunahuaqtit Naniriaqtuqtunilu Timianni uvanngat 1999-mit 2008-mut. Peter nulianilu Joanne, katihimakhaaqtuk avatquumayuni taalit (30) ukiut. Atauttimi qatanngutiqaqtuk tallimanik 5 nutaqqanit: Jason, Cheryl, Genevieve, Ian uvvalu Desiree. Nainguyunit (9) inngutaqaqtuk. Peter aligiyaa angunahuarnirmik maniqqamiunirmiglu. |
Maligaliurviq Nunavumi
|
|