 |
|
|
Tuhaqviginagialgit | Pilihaarniq | ᐃᓄᒃᑎᑐᑦ | English | Français |
|
 |
Pitjutait Maligaita uvvalu Maligaliuqtait |
|
Uqaqatigiiqattarniit (Hansardkutigut) |
Hamna maligaliritjutaat Nunavunmi aadjikkutarivyaktait
maligaliritjutait tamaita Kanatami Kavamatuqatkut,
Aviktuqhimayunilu maligainnik. Maligannguqtinnagu, Maligaq
una angiqtauyariaqaqtuq qaffinnguqtarluni
ihivriuqtauyariaqaqtuq. Talva malruuyuk ukuak Maligak:
Kavamatkut Maligait uvvalu Maligaliuqtit Maligait.
Kavamatkut Maligait hivulliutivagait ukuak Ministauyut.
Hapkua Maligakhat tukhiutauyungnaqtut nutaanik havaakhanik,
uvvaluunnin tukhiutiqalaaqtut ihuaqhaitjutikhainnik hapkua
Maligauyut. Kihiani, ukuanginnait Kavamatkut
hivuniqhiyungnaqtut atiqaqtumik "Maniktigut Manikhaq " – Una
Bl tukhiutiqaqtuq atuutikhainnik kavamatkut maniinik. HIVULLIRMIK TAIGUQTAUNINGA Talvannganin, una Bl hivuniqhitauvaktuq hivuliqpamik talvani Maligaliurvingmi. Una taininga Maligakhap taiguqtaubluni, kihiani aivatjutaulaittuq una Bl. talvannganin, una Bl kavamatkut titiratqiliqhugu, uvvalu kiali quyaginnaq tukhiinnariaqaqtaa ihivriuqtakhatik. Ukuat Maligaliurvingmi niruarniqqata huli hivumuutjutigivallialugu una Bl pigiaqtitauvaktuq Aippaanik Taiguqtauluni. AIPPAANIK TAIGUQTAUNINGA Talvannganin, Maligaliuqtit uqautiginiaqtaat una Bl. Una pigiaqtitihimayuq haffuminnga Maligakhamik uqarluarungnaqtuq huuq una Bl hivuniqhitjutiqaqtuq, uvvalu Qanuq nakurutauniarmangaata. Maligaliuqtit uqautigiinnariaqaqtaat una Bl talvanngaanin. Talva aivatjutaat haffumuuna Maligakhamut iniqqat, Ukuat maligaliurvingmi taitai niruanginnariaqaqtut. Una Bl Aippaanik Taiguqtaunginnarianikpat, hatqitauqattaqtuq talvunga Katimayiralaanun. Katimayiralaat Talvannganin, Una Bl ihivriuqtauttiaqpaktuq, makpiraqattaqhugit naliangnik Maligaliurviup Katimayiralaanginnit. Una pigiaqtittihimayuq haffuminnga Maligakhamik hatqiktivaktut Katimayiralaat katimatillugit kiunahuaqhutit Maligakhatigut apiqutauyunik. Ukuat Katimayiralaat qaitquiyungnaqtut kitunik timiuyunik uvvalu inungnik uqaallagiaqturumayunik Maligakhatigut Katimayiralaanun. Ukuat Katimayiralaat katimapkainginariaqaqtut naniliqaak nunalingni hapkua Maligakhat mikhaagut. Naliannguqpat una Bl uqautauyuq, ukuat Katimayiralaat ihumaqhurlutik katimatjutigiinnariaqaqtaat qaffinik ublunik uvvaluunniin pigiarningnik. Katimayiralaat tukhiutigiinnariaqaqtait ihuaqhautikhait ukuat maligakhat. Talvanngat iniqqata, Ukuat Katimayiralaat utiqtinniaqtaat una Bl Maligaliurvingmut. KATIMATUINNAQTILLUGIT Talvanngaanin, tamaita Maligaliuqtit nibliutigiinnariaqaqtaat una Maligaqhaq. Talvani Katimatuinnaqtillugit, una Uqqaqtittiyi ikhivautaunngittuq aivatillugit. Aivatjutait talvanngaanin ayurnaiqpaalliqpaktut . Una pigiaqtittihimayuq uuminnga Maligakhamik ikhivayariaqaqtuq talvani apiqhuiviani Maligaliurviup kiuqattarlugit hapkua Maligaliuqtiit apiqqutait Maligakhap mikhaagut. PINGAHUANIK TAIGUQTAUNINGA Hamna kingulliqpaanguniaqtuq una Maligakhaq Angiqtautinnagu uvvalu Maligannguqtautinnagu. Una pitjutauyuq ihivgiurutaubluni haffuminnga Maligakhamik tamatkiumalugu. ANGIRNINGA Talvanngaanin, Una Kamisina Nunavunmi Angirniaqtaa una Maligakhaq. Una aadjikkutaa uumap Kuin Kivgaqtuqtiata angirahuaqqagu una Maligakhaq Kanatami Aviktuqhimayuni. Taimaitkaluaqtillugit Inuktitut uvvalu Inuinnaqtun numiktitauqattaqtut tamaita hapkua Maligakhat, ukuanginnaq kablunaatitut uvvalu Uiviititut uqauhiit nukiqatqiyauyuq. Una Nunavut Gazette uvvalu iniqhimayut maligannguqtauyut hamani Nunavunmi ihivriunginnarialgit qaritauyakkut talvani Havagviata Apiqhuiliqiyiit Maligaliriyiuyut Qaritauyaita aulatjutainnin. |
Maligaliurviq Nunavumi
|
|