ᑲᑎᒪᔾᔪᑎᕕᓃᑦ ᑎᑎᕋᖅᑕᐅᕙᒃᐳᑦ ᐅᖃᐅᓯᓪᓚᑦᑖᕆᔭᐅᔪᕕᓃᑦ ᒪᓕᒐᓕᐅᕐᕕᖕᒥ ᑲᑎᒪᓂᖏᓐᓂ ᑎᑎᕋᖅᑕᐅᓪᓗᑎᒃ. ᓄᓇᕗᒻᒥ ᑲᑎᒪᔾᔪᑎᕕᓃᑦ ᑎᑎᕋᖅᑕᐅᕙᒃᐳᑦ ᐱᔪᓐᓇᕐᓂᖅᑖᖅᑎᑕᐅᓯᒪᓪᓗᑎᒃ ᒪᓕᒐᓕᐅᕐᕕᐅᑉ ᐅᖃᖅᑎᖓᓐᓄᑦ.
ᑲᑎᒪᔾᔪᑎᕕᓂᕐᓂᒃ ᑎᑎᕋᖅᑎᐅᖃᑦᑕᖅᑐᑦ ᐊᑐᐊᒐᖃᖅᐳᑦ ᑎᑎᕋᖅᐸᓪᓕᐊᖃᑦᑕᕐᓂᐊᕐᓗᑎᒃ ᐅᓄᓐᖏᓛᓂᒃ ᐋᖅᑭᒃᓱᐃᓗᑎᒃ ᐊᒻᒪᓗ ᒪᓕᒐᓕᐅᖅᑎᐅᑉ ᐅᖃᐅᓯᕆᓚᐅᖅᑕᖏᑦᑕ ᑐᑭᖏᑦ ᓱᕐᕋᒃᑕᐅᓐᖏᑦᑎᐊᕐᓗᑎᒃ.
ᑲᑎᒪᔾᔪᑎᕕᓃᑦ ᐋᖅᑭᒃᓱᖅᑕᐅᓯᒪᓐᖏᑎᓪᓗᒋᑦ ᑕᐃᔭᐅᕙᒃᐳᑦ “ᑐᖑᔪᖅᑐᓂᒃ” ᐱᐅᓯᑐᖃᐅᓚᐅᖅᓯᒪᔪᑐᑦ ᐊᒥᓱᕈᖅᑕᐅᖅᑳᖃᑦᑕᒪᑕ ᑐᖑᔪᖅᑐᓂᒃ ᐸᐃᑉᐹᓂᒃ ᐊᑐᖅᖢᑎᒃ - ᐊᒻᒪᓗ ᐊᑐᐃᓐᓇᕈᖅᑎᑕᐅᕙᒃᖢᑎᒃ ᖃᐅᑐᐊᕐᒪᑦ ᑲᑎᒪᓚᐅᖅᑎᓪᓗᒋᑦ ᒪᓕᒐᓕᐅᖅᑏᑦ. ᑭᖑᓪᓕᖅᐹᖅᓯᐅᑏᑦ, ᐋᖅᑭᒃᓱᖅᑕᐅᓯᒪᓕᖅᑐᑦ ᑲᑎᒪᔾᔪᑎᕕᓃᑦ ᐊᒥᓱᕈᖅᑎᑕᐅᓕᓲᖑᕗᑦ ᐅᖃᓕᒫᒐᓐᖑᖅᑎᑕᐅᓪᓗᑎᒃ ᐊᒻᒪᓗ ᐊᑐᐃᓐᓇᕈᖅᑎᑕᐅᕙᒃᑭᓪᓗᑎᒃ ᒪᓕᒐᓕᐅᕐᕕᐅᑉ ᖃᕆᓴᐅᔭᒃᑰᖅᑎᓯᒪᔭᖏᑦᑎᒍᑦ.